सरल असल साह्रै काव्य होस् पढ्न पाऊँ
शिखर धवल उस्तै शानले चढ्न पाऊँ
सहज मन दुबैको मध्यवर्ती निशाना
नयन युगल जुद्धा निस्कियोस् प्रेम गाना ।
सहुलियत मिलेको हुन्छ आँखा जुधाए
सहज सरल शैली चित्त मिल्दो बुझाए
अनवरत सदीक्षा चाहिएको हुनाले
मदनसित बलियो प्रेम गाँसिन् मुनाले ।
अपरिचित हुनाले बोल्न इच्छा अनाैठा
उकुसमुकुस छायो प्रेममा बन्न द्यौता
मधुरमण मिलेका बोल्न खप्पिस बानी
जय जय जय अम्बे जप्न थाल्छन् भवानी ।
अभिनव कवितामा व्यासको दिव्य झल्को
मणिमय सपना होस् भव्य देदीप्य सल्को
सहज उपज राम्राे प्रेमको वागवानी
चमकमय सफा होस् प्रेमकै यो बिहानी ।
हृदय कमल छोप्ने प्रेमको होस् पछ्यौरी
ललित मन मिलेको भावना बाँध्न डोरी
शुभ यश लय मिल्ने नेत्रका तीक्ष्ण भाखा
अलि वर अझ आऊ गुन्जियोस् भीर पाखा
• याम्दे, तनहुँ ।
