प्रहार समाचार । काठमाडौं, २४ असोज २०८३ शनिबार । नेपाली कांग्रेसको १५औँ महाधिवेशनअन्तर्गत सभापति पदमा गगनकुमार थापा भारी मतान्तरसहित निर्वाचित भएका छन् ।
हिंजो सम्पन्न निर्वाचनमा थापाले ६ हजार ५८४ मत प्राप्त गर्दा उनका प्रतिस्पर्धी श्यामकृष्ण खड्गीले ३७५ मत मात्रै पाए । कुल ७ हजार १३ मत खसेकोमा ६ हजार ९५९ मत सदर र ५४ मत बदर भएका थिए । निर्वाचन परिणामअनुसार थापाले खड्गीलाई ६ हजार २ सय ९ मतले पछि पार्दै सभापति पदमा विजय हासिल गरेका हुन् ।
थापाको पक्षमा देखिएको फराकिलो मतान्तरले कांग्रेसको आन्तरिक नेतृत्व चयनमा स्पष्ट जनमतको संकेत गरेको छ । सभापति पदमा खसेको सदर मतमध्ये थापाले करिब ९४.६ प्रतिशत मत प्राप्त गरेका छन् भने खड्गीको मत करिब ५.४ प्रतिशतमा सीमित भएको छ । यो परिणामले पार्टीभित्र नेतृत्व चयनका लागि भएको प्रतिस्पर्धाको मतपरिणामलाई स्पष्ट पारेको छ । तर, निर्वाचनको अंकगणितसँगै नयाँ नेतृत्वले पार्टीभित्रको गुटगत विभाजन, संगठनात्मक चुनौती र बदलिँदो राजनीतिक परिस्थितिलाई कसरी सम्बोधन गर्छ भन्ने प्रश्न अब महत्वपूर्ण बनेको छ ।
मतबाट स्थापित नेतृत्वको वास्तविक परीक्षा अब परिणामपछि सुरु हुनेछ । कांग्रेसको विधान, २०१७ (एघारौँ संशोधनसहित) तथा निर्वाचन निर्देशिका–२०८३ बमोजिम सम्पन्न निर्वाचनको परिणामले थापालाई पार्टीको नेतृत्व गर्ने जिम्मेवारी सुम्पिएको छ । फराकिलो मतान्तरलाई संगठन सुदृढीकरण, आन्तरिक एकता र जनअपेक्षाअनुसार राजनीतिक कार्यदिशा तय गर्ने अवसरमा रूपान्तरण गर्नु उनको प्रमुख चुनौती हुनेछ । निर्वाचनमा प्राप्त मतलाई केवल विजयको अंकगणितमा सीमित नराखी पार्टीको व्यवहार र कार्यशैलीमा परिवर्तन ल्याउन सक्नु नै नयाँ नेतृत्वको आगामी राजनीतिक कसौटी हुनेछ ।
