प्रहार समाचार । काठमाडौं, २४ असोज २०८३ शनिबार । मौसममा फेरि बदलीको संकेत देखिएको छ । कोशी, बागमती र गण्डकी प्रदेशका हिमाली तथा पहाडी भूभागका केही स्थानमा मेघगर्जन र चट्याङसहित मध्यमसम्मको वर्षा हुने सम्भावना रहेको छ । लुम्बिनी, कर्णाली र सुदूरपश्चिम प्रदेशका हिमाली तथा पहाडी क्षेत्रका एक–दुई स्थानमा समेत वर्षा हुन सक्ने मौसम पूर्वानुमान छ ।
कोशी प्रदेशका तराई क्षेत्रमा पनि मेघगर्जन र चट्याङसहित वर्षाको सम्भावना रहेकाले मौसमको अवस्थाप्रति सतर्क रहनुपर्ने देखिएको छ ।शनिबार दिउँसो कोशी प्रदेशका सबै भूभागसहित देशका हिमाली तथा पहाडी क्षेत्रमा साधारणतया बादल लाग्नेछ भने तराईका क्षेत्रमा आंशिक बदली हुने पूर्वानुमान छ । राति हिमाली तथा पहाडी क्षेत्रमा आंशिक बदली रहने र तराईमा मौसम मुख्यतया सफा रहने अनुमान गरिएको छ । यद्यपि, तराईका केही स्थानमा बिहानपख हुस्सु लाग्न सक्नेछ ।
राति कोशी, बागमती र गण्डकी प्रदेशका हिमाली तथा पहाडी भूभागका एक–दुई स्थानमा हल्का वर्षा वा हिमपातको सम्भावनासमेत रहेको छ ।पछिल्लो २४ घण्टामा पनि देशका केही स्थानमा भारी वर्षा हुनुका साथै धेरै ठाउँमा मध्यम वर्षा भएको विवरण छ । वर्षाको सम्भावना रहेका क्षेत्रमा मेघगर्जन, चट्याङ र स्थानीय मौसम परिवर्तनलाई बेवास्ता गर्न नहुने देखिन्छ । विशेषगरी पहाडी तथा हिमाली क्षेत्रमा यात्रा गर्ने, खुला ठाउँमा काम गर्ने र तराई क्षेत्रमा बिहानै यात्रा गर्नेहरूले मौसमको अवस्थाबारे जानकारी लिएर सावधानी अपनाउनु उपयुक्त हुनेछ ।
