प्रहार समाचार । तनहुँ, २२ भदौ २०७३ सोमबार । रसुवाको भोटेकोशीमा आएको विनाशकारी बाढीपहिरोबाट प्रभावित नागरिकको पीडामा साथ दिन नेपाल दशनामी समाज जिल्ला कार्यसमिति, तनहुँले यस वर्ष आयोजना गर्ने भनिएको महिला दिदीबहिनीहरूको ‘दर खाने कार्यक्रम’ स्थगित गरेको छ। कार्यक्रमका लागि छुट्याइएको रकम तथा विभिन्न स्रोतबाट प्राप्त सहयोग संकलन गरी समाजले प्रधानमन्त्री दैवी प्रकोप उद्धार कोषमा रु. ६४ हजार ४५५ जम्मा गरेको हो।
चाडपर्वको अवसरमा हुने नियमित भेटघाट र दर खाने कार्यक्रमलाई प्राथमिकताभन्दा माथि राख्दै विपत्तिमा परेका नागरिकको राहतलाई पहिलो प्राथमिकता दिने निर्णय समाजले गरेको हो। बाढीपहिरोका कारण ठूलो मानवीय तथा भौतिक क्षति भइरहेका बेला आफ्ना खुसीका कार्यक्रम स्थगित गरेर पीडितका लागि सहयोग जुटाउने निर्णय गरिएको समाजले जनाएको छ।समाजका अध्यक्ष बाबुराम पुरीले प्राकृतिक विपत्तिको यस कठिन घडीमा पीडित नागरिकको दुःखलाई आफ्नो दुःख सम्झेर सहयोग गर्नु सामाजिक दायित्व भएको बताए।
उनले विपत्तिका बेला औपचारिक कार्यक्रम र व्यक्तिगत उत्सवभन्दा पीडितको जीवनरक्षा, राहत तथा पुनःस्थापनामा सहयोग पुर्याउनु महत्वपूर्ण रहेको बताए।“हामीले यस वर्षको दर खाने कार्यक्रमलाई निरन्तरता दिनुभन्दा विपत्तिमा परेका दाजुभाइ तथा दिदीबहिनीको राहतमा सहयोग गर्नु उचित ठान्यौँ,” अध्यक्ष पुरीले भने, “सानो भए पनि हाम्रो सहयोगले पीडित परिवारमा आशा र अपनत्वको भावना जगाउने विश्वास गरेका छौँ।”समाजले कार्यक्रम स्थगित गरेर बचत भएको रकमसँगै प्राप्त सहयोगसमेत संकलन गरी उक्त रकम राहत कोषमा जम्मा गरेको जनाएको छ।
सामाजिक तथा सांस्कृतिक कार्यक्रमलाई मानवीय सेवासँग जोड्दै समाजले विपद्का बेला सहयोग र सहकार्यको संस्कारलाई अझ बलियो बनाउनुपर्नेमा जोड दिएको छ।रसुवाको भोटेकोशी क्षेत्रमा आएको बाढीपहिरोले जनधनमा ठूलो क्षति पुर्याएपछि देशभरबाट पीडितको उद्धार, राहत तथा पुनःस्थापनाका लागि सहयोग जुटाउने क्रम जारी छ। नेपाल दशनामी समाज तनहुँको निर्णयले ‘उत्सव स्थगित गरेर उद्धारमा हातेमालो’ गर्ने सामाजिक भावनाको उदाहरण प्रस्तुत गरेको छ।
