प्रहार समाचार । काठमाडौँ, २८ चैत २०८२ शनिबार । आज देशको मौसममा पश्चिमी तथा स्थानीय वायुको प्रभाव देखिएको छ। यसको असरले कोशी, बागमती र गण्डकी प्रदेशका पहाडी तथा हिमाली भू–भागमा सामान्यदेखि पूर्ण बदली भएको छ भने अन्य पहाडी क्षेत्रमा आंशिक बदली र तराई क्षेत्रमा मौसम मुख्यतया सफा रहेको छ।
जल तथा मौसम पूर्वानुमान महाशाखाका अनुसार आज दिउँसो कोशीसहित देशका हिमाली क्षेत्रमा बदली रहनेछ भने पहाडी क्षेत्र र कोशीको तराईमा आंशिक बदली हुनेछ। कोशी, गण्डकी, कर्णाली र सुदूरपश्चिम प्रदेशका हिमाली भू–भागका केही स्थानमा मेघगर्जन र चट्याङसहित हल्का वर्षा वा हिमपातको सम्भावना रहेको छ भने लुम्बिनी र सुदूरपश्चिमका तराई क्षेत्रमा हुरी चल्न सक्ने चेतावनी दिइएको छ।
रातिको समयमा पनि हिमाली क्षेत्रमा बदली कायम रहने र पहाडी क्षेत्रमा आंशिक बदली रहने अनुमान छ। कोशी, गण्डकी र कर्णाली प्रदेशका हिमाली तथा केही पहाडी क्षेत्रमा चट्याङसहित हल्का वर्षा वा हिमपात हुन सक्ने सम्भावना देखिएकोले महाशाखाले प्रभावित क्षेत्रका सर्वसाधारण तथा सवारी चालकलाई विशेष सतर्कता अपनाउन आग्रह गरेको छ।
