प्रहार समाचार । काठमाडौँ, २८ जेठ २०८२ बुधवार । स्वतन्त्र विद्यार्थी यूनियन, पद्मकन्या बहुमुखी क्याम्पसले विद्यार्थी तथा कर्मचारीहरूका लागि प्रभावकारी स्वास्थ्य सेवा र सामूहिक स्वास्थ्य बीमा कार्यक्रम सञ्चालनको माग गर्दै स्वास्थ्य तथा जनसंख्या मन्त्रालयमा ज्ञापनपत्र बुझाएको छ।
स्ववियू सभापति भूपी ऐरको नेतृत्वमा गएको प्रतिनिधिमण्डलले आज स्वास्थ्य तथा जनसंख्या मन्त्री प्रदीप पौडेलसँग भेट गरी पत्र हस्तान्तरण गरेको हो।
ज्ञापनपत्रमा विद्यार्थी र शिक्षण/गैर-शिक्षण कर्मचारीहरूलाई लक्षित गरी स्वास्थ्य सेवा सुविधा पहुँच योग्य बनाउने, स्रोत–साधनको अभाव हटाउने र सबैका लागि स्वास्थ्य बीमा उपलब्ध गराउने उल्लेख गरिएको छ। सभापति ऐरले सार्वजनिक शैक्षिक संस्थामा अध्ययनरत विद्यार्थीहरूलाई सुरक्षित र स्वस्थ शैक्षिक वातावरण दिन राज्यको दायित्व रहेको स्पष्ट पारिन्।
स्ववियू प्रतिनिधिमण्डल र मन्त्रीबीचको छलफलमा स्वास्थ्य बीमा योजनाको लागत व्यवस्थापन, सेवा विस्तार, तथा दीर्घकालीन प्रभावकारिता सम्बन्धमा ग
छलफल गरिएको थियो। स्ववियू सदस्य चेतना नहर्कीका अनुसार, छात्राहरूलाई लक्षित गरेर बीमाका थप विकल्पहरू पनि अध्ययन गर्नुपर्ने आवश्यकता औंल्याइएको थियो।
मन्त्री पौडेलले विद्यार्थी हितमा यस्ता पहलहरू सकारात्मक रहेको बताउँदै, शिक्षा क्षेत्रलाई समेट्ने स्वास्थ्य बीमा नीति बनाउन मन्त्रालय गम्भीर रूपमा लागिपरेको जानकारी गराएका थिए। पद्मकन्या स्ववियूले आगामी दिनमा बीमा र स्वास्थ्य सुविधा विस्तारका लागि निरन्तर दबाबमूलक पहल गर्ने जनाएको छ।
