प्रहार समाचार । तनहुँ, १६ पुस २०८१ मङ्गलबार । आज ४८औं मेलमिलाप दिवश देशैभरी विभिन्न कार्यक्रमका साथ मनाइएको छ। यसै अवसरमा बिपि विचार समाज तनहुँले दमौलीमा एक अन्तरक्रिया कार्यक्रम सम्पन्न गरेको छ ।
कार्यक्रममा बोल्दै युवा नेता दीपक राज जोशीले मेलमिलाप दिवस कांग्रेसको मात्र होइन सबै पार्टीको हुनुपर्छ भन्दै मेलमिलाप समाजको समृद्धिको लागि हुनु पर्नेमा जोड दिए ।
उनले मेलमिलाप सत्तामा जाने भऱ्याङ बनाइएको र सिद्धान्तमा विचलन आए पछि कुनै पनि पार्टीको अस्तित्व नरहने बताए । नेता जोशीले भने – ‘अहिले नेपालमा सिद्धान्त विचल आएको छ, बीपी विचारको देखावटी खोल ओढेर बसेका छन् । ‘ राष्ट्रियतालाई पहिलो प्राथमिकतामा राखेर समाज निर्माणमा जुट्न पर्ने बेला आएको उनको भनाई थियो । ‘आगामी दिनमा बीपी कोइरालाको सम्झना उहाँले देखाएको मेलमिलापको पथलाई पछ्याउँदै गरियोस्, बोक्रे सम्मान देखाएर होइन’ उनले थपे ।
कार्यक्रममा वरिष्ट अधिवक्ता परशुराम गिरीले बिपिको मेलमिलाप नीति बारे प्रस्ट पार्दै उनले लिएको बाटो लिनु पर्ने बताए । अधिवक्ता ऋषिराम पोखरेलले बिपि कोइरालाको मेलमिलापको नीति कांग्रेसले अनुशरण नगरेको कारणले नेपाली कांग्रेसको राजनैतिक अस्तित्व सकिएको बताए ।
कार्यक्रममा बिपि विचार समाजका केन्द्रीय सदस्य सुकुम गुरुङले राजाको राष्ट्रिययता , बीपीको प्रजातन्त्र साथ साथ नगएकोले आज हाम्रो समाज को यस्तो अवस्थामा पुगेको धारणा राखे ।
कार्यक्रममा बिपि विचार समाजका रघु बहादुर केसी, कमलभक्त पोखरेल लगायतले आफ्नो मन्तव्य राख्नु भएको थियो। कार्यक्रम बिपि विचार समाजका कार्यबाहक सभापति क्याप्टेन रेशम बहादुर गुरुङ्को अध्यक्षतामा सम्पन्न भएको थियो।
