प्रहार समाचार । कास्की, जेठ २१ बिहीबार । पछिल्लो चार दिनको सार्वजनिक बिदाको अवसरमा म्याग्दी र मुस्ताङका प्रमुख पर्यटकीय तथा धार्मिक गन्तव्यमा पर्यटकको उल्लेखनीय चहलपहल देखिएको छ। जेठ १४ देखि १७ गतेसम्मको अवधिमा मुक्तिनाथ, कागबेनी, कोरला नाका तथा भुरुङ–तातोपानीलगायत क्षेत्रहरूमा ३० हजारभन्दा बढी आन्तरिक तथा बाह्य पर्यटक पुगेका छन्।
यस अवधिमा ती क्षेत्रका होटल, रेष्टुरेन्ट, यातायात तथा अन्य पर्यटन व्यवसाय समेत व्यस्त बनेका थिए।विशेषगरी धार्मिक आस्थाको केन्द्र मानिने मुक्तिनाथ मन्दिर मा दर्शनार्थीको ठूलो भीड लागेको थियो। त्यस्तै ऐतिहासिक तथा सांस्कृतिक महत्व बोकेको कागबेनी र चीन सीमासँग जोडिएको कोरला नाका समेत पर्यटकका लागि आकर्षणको केन्द्र बने। प्राकृतिक तातोपानी स्नानका लागि परिचित भुरुङ–तातोपानी मा पनि उल्लेख्य संख्यामा आगन्तुक पुगेका थिए।पर्यटन व्यवसायीका अनुसार लामो बिदा, अनुकूल मौसम र सडक पहुँचमा सुधारका कारण यसपटक पर्यटकको संख्या उल्लेख्य रूपमा बढेको हो। आन्तरिक पर्यटकसँगै विदेशी पर्यटकको उपस्थितिले हिमाली क्षेत्रको पर्यटन गतिविधिलाई थप चलायमान बनाएको छ।
स्थानीय व्यवसायीले समेत यस अवधिमा राम्रो आर्थिक कारोबार भएको बताएका छन्।हिमाली सौन्दर्य, मौलिक संस्कृति, धार्मिक सम्पदा र साहसिक पर्यटनको संगमका रूपमा परिचित मुस्ताङ र म्याग्दीले पुनः पर्यटकको रोजाइमा परेको संकेत देखिएको छ। पछिल्ला दिनमा बढ्दो पर्यटक आगमनले नेपालको पर्वतीय पर्यटन पुनरुत्थानतर्फ अग्रसर रहेको सन्देश दिएको छ भने यसले स्थानीय अर्थतन्त्रमा समेत सकारात्मक प्रभाव पार्ने अपेक्षा गरिएको छ।
