प्रहार समाचार । तनहुँ, १ पुस २०८२ मंगलबार । तनहुँ जिल्लाको बन्दिपुर गाउँपालिका–१, तल्लोटार अब केवल राजमार्गको एक मोड मात्र रहने छैन, यो राष्ट्रिय पहिचान, पर्यटन र स्थानीय युवाको एकताको प्रतीकका रूपमा चिनिन थाल्ने भएको छ। स्थानीय युवाको अग्रसरतामा “स्थानीय पर्यटन पहिचान तथा राष्ट्रिय भावनाको विकास” भन्ने उद्देश्यसहित नेपालकै सबैभन्दा ठूलो राष्ट्रिय झण्डासहितको झण्डा पार्क निर्माणको तयारी अन्तिम चरणमा पुगेको छ।
पृथ्वी राजमार्ग हुँदै काठमाडौं–पोखरा आवतजावत गर्ने हजारौँ यात्रुका आँखामा पर्ने गरी निर्माण हुन लागेको यो झण्डा पार्क, गोरखाको पालुङटार, तनहुँको बन्दिपुर गाउँपालिका र आँबुखैरेनी गाउँपालिकाका अधिकांश भूभागबाट पनि सहजै देख्न सकिनेछ। यसले राजमार्ग यात्रालाई केवल गन्तव्यमा पुग्ने साधन मात्र नभई, देशप्रेम र प्राकृतिक सौन्दर्यसँग जोडिएको अनुभवमा बदल्ने अपेक्षा गरिएको छ।
आयोजनाका अध्यक्ष प्रेम गिरिका अनुसार, डुम्रेबाट पोखरातर्फ करिब पाँच किलोमिटर दूरीमा पर्ने तल्लोटारस्थित कल्याणेश्वर मन्दिर प्राङ्गणमा प्रस्तावित झण्डा पार्क निर्माण हुनेछ। धार्मिक, सांस्कृतिक र प्राकृतिक महत्व बोकेको यो स्थानमा राष्ट्रिय झण्डा फहरिनु आफैंमा नयाँ पर्यटकीय आकर्षण बन्ने विश्वास लिइएको छ।
विशेष कुरा के छ भने, यो आयोजना कुनै ठूला लगानीकर्ता वा बाह्य संस्थाको भरमा होइन, स्थानीय युवाको देउसी–भैलो कार्यक्रमबाट सुरु भएको अभियान हो। स्थानीय स्रोत–साधन, जनसहभागिता र स्वस्फूर्त आर्थिक सहयोग संकलनमार्फत अघि बढाइएको यस परियोजनामा देश–विदेशबाट समेत उत्साहजनक सहयोग र सहभागिता जुटिरहेको अध्यक्ष गिरिले जानकारी दिए।
झण्डा पार्क निर्माण भएपछि बन्दिपुर क्षेत्रको पर्यटनमा नयाँ आयाम थपिने, आन्तरिक तथा बाह्य पर्यटकलाई आकर्षित गर्ने, स्थानीय रोजगारी र व्यवसाय प्रवर्द्धनमा टेवा पुग्ने अपेक्षा गरिएको छ। साथै, पृथ्वी राजमार्गमा यात्रा गर्ने जो–कोहीका लागि यो पार्क रोकिने, तस्बिर खिच्ने र नेपालको पहिचान महसुस गर्ने प्रमुख गन्तव्य बन्ने देखिन्छ।
तल्लोटारमा फहरिन लागेको यो विशाल राष्ट्रिय झण्डा केवल कपडाको टुक्रा होइन, यो स्थानीय युवाको सपना, सामूहिक प्रयास र राष्ट्रप्रेमको प्रतीक हो। पर्यटनसँगै राष्ट्रिय भावना जगाउने यस्तो पहलले बन्दिपुरलाई अझ उचाइमा पुर्याउने निश्चित देखिन्छ।
