प्रहार समाचार । सर्लाही, २९ कात्तिक २०८३ आइतबार । निर्वाचनको मिति र राजनीतिक तयारीलाई लिएर अन्योल भइरहेका बेला नेपाली कांग्रेसका सभापति गगन थापाले प्रदेशसभा र स्थानीय तह निर्वाचनबारे निर्वाचन आयोगले प्रमुख राजनीतिक दलहरूसँग छलफल गर्न मङ्सिर ४ गते बोलाएको खुलासा गरेका छन्।

छठ पर्वको अवसरमा सर्लाहीमा आयोजित कार्यक्रममा बोल्दै थापाले आयोगको निमन्त्रणाबारे जानकारी दिएका हुन्। निर्वाचनको विषय अब राजनीतिक बहसबाट संस्थागत छलफलतर्फ अघि बढ्न लागेको उनको भनाइले संकेत गरेको छ।थापाका अनुसार निर्वाचन आयोगले मङ्सिर ४ गते प्रमुख राजनीतिक दलहरूलाई बोलाएर प्रदेशसभा र स्थानीय तह निर्वाचनका विषयमा छलफल गर्नेछ। उक्त छलफलबाट निर्वाचनको सम्भावित मिति र प्रक्रियाबारे स्पष्टता आउने अपेक्षा गरिएको छ। तर निर्वाचन कहिले र कुन प्रक्रियाबाट अघि बढ्छ भन्ने विषयमा आयोगसँग हुने छलफलले नै आगामी राजनीतिक दिशालाई प्रभावित गर्ने देखिन्छ।

आयोगसँगको छलफलपछि तय हुने कार्यतालिका र मितिअनुसार कांग्रेसका सबै तहका संगठनलाई स्थानीय तह निर्वाचनमा केन्द्रित गरिने सभापति थापाले बताएका छन्। उनको यो अभिव्यक्तिले कांग्रेस निर्वाचनको तयारीमा लाग्न खोजेको सन्देश दिएको छ। अब प्रश्न निर्वाचन आयोगले कस्तो समयतालिका अघि सार्छ र राजनीतिक दलहरू त्यसमा कति गम्भीरतापूर्वक प्रस्तुत हुन्छन् भन्ने हो। निर्वाचनको चर्चा मात्रै होइन, समयमै निर्वाचन गराउने राजनीतिक इच्छाशक्ति र तयारीको परीक्षा पनि सुरु हुने देखिएको छ।





















