प्रहार समाचार । काठमाडौँ, १५ मंसिर २०८२ सोमबार । काठमाडौँ महानगरपालिकाका प्रमुख बालेन्द्र शाह (बालेन) पितृ शोकमा परेका छन् । आयुर्वेदिक चिकित्सकसमेत रहेर सेवा पुर्याउँदै आएका उनका पिता डा. रामनारायण साहको उपचारका क्रममा आज निधन भएको हो ।
मेयर शाहका पिता ७७ वर्षीय डा. रामनारायण साहको स्वास्थ्य अवस्था बिग्रिँदै गएपछि आइतबार अस्पताल भर्ना गरिएको थियो । मधुमेह तथा पिसाबको सङ्क्रमणले जटिलता बढेपछि उनलाई निजामति कर्मचारी अस्पताल मिनभवनको भेन्टिलेटरमा राखेर उपचार प्रयास जारी राखिएको अस्पतालले जनाएको छ ।
अस्पतालका निर्देशक डा. मोहनचन्द्र रेग्मीका अनुसार उपचारका क्रममा आज दिउँसो साहको निधन भएको हो । ‘‘हामीले आइतबार बिहानदेखि भेन्टिलेटरमा राखेर उपचार गरिरहेका थियौँ, तर मधुमेहसङ्ग संबंधित जटिलता बढ्दै गएपछि उहाँलाई बचाउन सकिएन,’’ रेग्मीले जानकारी दिए ।
निधनपछि उनको पार्थिव शरीरलाई अन्तिम श्रद्धाञ्जलीका लागि पशुपति आर्यघाटमा राखिएको थियो । दिउँसो ३:१५ बजे श्रद्धाञ्जली कार्यक्रम सम्पन्न भएपछि साँझ विधिपूर्वक दाहसंस्कार गरिएको परिवार स्रोतले बताएको छ ।
आयुर्वेदिक चिकित्सकका रूपमा लामो समय सेवा गरेका डा. साहको निधनले परिवार, चिकित्सक समुदाय र काठमाडौँ महानगरका नागरिकमा गहिरो शोक छाएको छ
