प्रहार समाचार । तनहुँ ,८ मंसिर २०८२ सोमबार । तनहुँको व्यास नगरपालिका–३ स्थित जिल्ला समन्वय समिति परिसरभित्र रहेको स्व. राजा महेन्द्र स्मृति उद्यान—जो केही वर्षदेखि निजी नर्सरीका कारण अस्तव्यस्त र कुरूप अवस्थामा थियो—अब परिवर्तनको मोडमा पुगेको छ। राप्रपा तनहुँका अध्यक्ष विनोद घर्तीको नेतृत्वमा गरिएको निरन्तर प्रयासपछि नर्सरी पूर्ण रूपमा हटाइँदा उद्यान नयाँ रूप लिन तयार भएको हो।
राप्रपा तनहुँले आगामी दिवसमा यो स्थानलाई आधुनिक, व्यवस्थित र आकर्षक पार्कमा विकास गर्ने लक्ष्यसहित विस्तृत प्रस्ताव व्यास नगर प्रमुख बैकुण्ठ न्यौपानेलाई आज हस्तान्तरण गरेको छ। मेयर न्यौपानेले पनि सकारात्मक धारणा व्यक्त गर्दै सामुदायिक स्वामित्वमा आधारित विकासका योजनालाई साथ दिने संकेत गरेका छन्।
यो अभियान केवल एक उद्यानको सौन्दर्यकरण मात्र होइन, बर̃न ‘सामूहिक प्रयास र स्थानीय नेतृत्वको शक्तिले शहरलाई कसरी नयाँ उचाइमा पुर्याउन सक्छ’ भन्ने प्रेरणादायी उदाहरण बन्दै गएको छ।
करिब एक दशकदेखि नर्सरी सञ्चालन भइरहेकाले उद्यानको मूल स्वरूप हराउँदै गएको र स्थानीयको भावनासँग पनि खेलवाड भएको महसुस गर्दै राप्रपाले २०८२ भदौ १८ मा उद्यान फिर्ता गरिदिन नगरपालिकासमक्ष निवेदन दिएको थियो। त्यसअनुसार नर्सरी स्थानान्तरण भइसकेपछि राप्रपा तनहुँले नगरपालिकालाई धन्यवाद ज्ञापन गर्दै अब उद्यानलाई तनहुँकै पहिचान बन्ने ‘आकर्षक पार्क’मा रूपान्तरण गर्ने प्रतिज्ञा गरेको छ।
राप्रपा तनहुँका अनुसार, “सार्वजनिक सम्पत्ति सबैको हो, यसको सम्हाल–सजावट सामूहिक उत्तरदायित्व हो।” यही सोचलाई आधार बनाएर उनीहरूले उद्यान विकासमा सबै तनहुँबासीको सुझाव, सहयोग र सहभागिताको आह्वान गरेका छन्।
सार्वजनिक स्थानलाई सुन्दर बनाउने अभियानले शहर मात्र होइन, नागरिकको मानसिकता, संस्कृति र अपनत्व पनि बदलिन्छ भन्ने विश्वाससहित सुरु गरिएको यो कदम अब तनहुँमा सामूहिक विकासको नयाँ प्रेरणा बन्न सक्छ।
