प्रहार समाचार । तनहुँ, ११ कात्तिक २०८३ बुधबार । तनहुँमा नदीजन्य पदार्थको अवैध उत्खनन तथा ओसारपसार रोकिएको छैन। प्रहरीले कारबाही गरिरहने, अवैध उत्खननमा संलग्न सवारीसाधन नियन्त्रणमा लिने र जरिवाना तिराएर छाड्ने क्रम दोहोरिँदा नदी दोहनको समस्या भने कायमै देखिएको छ।
प्रहरीका अनुसार आज शुक्लागण्डकी नगरपालिका–७ स्थित दोभान म्याग्दे खोलामा अवैध रूपमा नदीजन्य पदार्थ उत्खनन तथा ओसारपसारमा संलग्न दुईवटा ट्र्याक्टर नियन्त्रणमा लिइएका छन्। इलाका प्रहरी कार्यालय बेलचौताराबाट खटिएको प्रहरी टोलीले नियन्त्रणमा लिएका दुवै ट्र्याक्टरलाई आवश्यक कारबाहीका लागि शुक्लागण्डकी नगरपालिकाको कार्यालयमा पठाएको थियो। नगरपालिकाले प्रतिट्र्याक्टर १२ हजार रुपैयाँका दरले कुल २४ हजार रुपैयाँ जरिवाना गराएर छाडेको जिल्ला प्रहरी कार्यालय तनहुँका सूचना अधिकारी प्रहरी नायब उपरीक्षक द्वारिका प्रसाद घिमिरेले जानकारी दिएका छन्।
अवैध उत्खननमा संलग्न सवारीसाधन नियन्त्रणमा लिनु र जरिवाना तिराउनु मात्रै नदी दोहन रोक्ने पर्याप्त उपाय हो कि होइन भन्ने प्रश्न फेरि उठेको छ। पटक–पटक उस्तै प्रकृतिका घटना दोहोरिनुले अवैध उत्खननविरुद्धको कारबाही कति प्रभावकारी छ भन्नेबारे गम्भीर समीक्षा आवश्यक देखिएको छ। नदीजन्य पदार्थको अवैध उत्खननले नदीको प्राकृतिक स्वरूप, वातावरण र स्थानीय बस्तीमा पार्न सक्ने असर रोक्न सम्बन्धित निकायले नियमित अनुगमन, कानुनको प्रभावकारी कार्यान्वयन र दोहोर्याएर संलग्न हुनेमाथि प्रचलित कानुनबमोजिम कडा कारबाही गर्नुपर्ने देखिन्छ। अन्यथा, प्रहरीको नियन्त्रण र जरिवानाको सिलसिला चलिरहने तर नदी दोहनको समस्या ज्यूँका त्यूँ रहने जोखिम कायमै रहनेछ।
