प्रहार समाचार । तनहुँ, ८ मंसिर २०८२ सोमबार । तनहुँको चुँदी रम्घामा आदिकवि भानुभक्त आचार्यको जन्मस्थललाई राष्ट्रिय एकता, भाषा र साहित्यको प्रमुख केन्द्रका रूपमा विकास गर्न ‘भानु साहित्य उद्यान’, ‘भानु वाटिका’ र ‘सप्तधाम’ निर्माणका लागि राष्ट्रपति रामचन्द्र पौडेलको पहलमा वर्ष ०८२/०८३ मा करिब २३ करोड रुपैयाँ विनियोजन भएको छ।
परियोजनाको पहिलो चरणमा करिब ४०० रोपनी जग्गा अधिग्रहण सम्पन्न भइसकेको छ। नगर प्रमुख आनन्दराज त्रिपाठीका अनुसार विस्तृत आयोजना प्रतिवेदन (DPR), संक्षिप्त वातावरणीय अध्ययन (BES) र प्रारम्भिक वातावरणीय अध्ययन (IEE) प्रक्रिया हाल तीव्र गतिमा अघि बढिरहेको छ। उनले भने, “शहरी विकास मन्त्रालयका महानिर्देशकले स्थलगत अनुगमन गरेसँगै परियोजना अब कार्यान्वयनको तीव्र मोडमा प्रवेश गर्ने अपेक्षा गरिएको छ।” त्रिपाठीले अध्ययन प्रतिवेदन स्थानीय तहमै प्रस्तुत गर्नुपर्ने स्थानीयको माग उचित रहेको बताउँदै, योजनाको गुणस्तर, संरक्षण र दीर्घ उपयोगितामाथि नगरपालिका जिम्मेवार रहने प्रतिबद्धता जनाए।
स्थानीय बासिन्दाले पनि परियोजना प्रत्यक्ष–परोक्ष रूपमा आफूहरूसँग सम्बन्धित हुने भएकाले निर्माण, संरक्षण र अनुगमनमा प्राथमिकता र सहकार्य आवश्यक रहेको धारणा राखेका छन्। उनीहरुले चुँदी रम्घालाई पर्यटन तथा साहित्यिक केन्द्र बनाउन स्थानीय भूमिका निर्णायक हुने बताएका छन्।
यसैबीच, भानुभक्तको साहित्यिक योगदानलाई दीगो संरक्षण गर्न उद्यानभित्र ‘भाषा–साहित्य अध्ययन तथा अनुसन्धान केन्द्र’ र ‘बृहत् पुस्तकालय’ समावेश गर्न स्थानीय बुद्धिजीवीले सुझाव दिएका छन्। उनीहरूको भनाइमा यसले नेपाली भाषा र साहित्य अनुसन्धानमा नयाँ आधार तयार पार्नेछ।
स्थानीयले पूर्वमा निर्माण भएका संरचना—जस्तै शिखर कटेरीस्थित रामायण भवन—जस्तै प्रयोगविहीन र संरक्षणविहीन बन्न नदिन स्पष्ट व्यवस्थापन योजना आवश्यक रहेको पनि बताएका छन् ।
समग्रमा, राष्ट्रपति पौडेलको प्रत्यक्ष चासोसहित अघि बढिरहेको ‘भानु साहित्य उद्यान’ परियोजनाले चुँदी रम्घालाई राष्ट्रिय तथा अन्तर्राष्ट्रिय पर्यटन, संस्कृति र साहित्यको केन्द्रमा उभ्याउने अपेक्षा गरिएको छ।राष्ट्रपति र पौडेलको प्रत्यक्ष पहलमा अघि बढेको यस परियोजनाप्रति आदिकविका वंशज सन्देश आचार्यले दशकौंको उपेक्षापछि भानुभक्तप्रति राज्यको जिम्मेवारी पूरा हुन थालेको भन्दै आभार व्यक्त गरेका छन्।
