प्रहार समाचार । काठमाडौं, ६ साउन ६ मङ्गलवार । नेपालका प्रथम जननिर्वाचित प्रधानमन्त्री एवं प्रजातान्त्रिक आन्दोलनका पुरोधा विश्वेश्वरप्रसाद कोइरालाको ४३औँ स्मृति दिवस आज मुलुकभर विविध कार्यक्रम गरेर मनाइएको छ। नेपाली कांग्रेस, त्यसका भ्रातृ संस्था र बिपी सङ्ग्रहालय समितिद्वारा आयोजित कार्यक्रमहरूमा बिपीप्रति श्रद्धाञ्जली अर्पण गर्दै लोकतन्त्र, राष्ट्रियता र समाजवादप्रतिको उनको योगदानको स्मरण गरिएको छ।
बिपी कोइरालाको निधन वि.सं. २०३९ साउन ६ गते भएको थियो। उनले वि.सं. २०१५ को आम निर्वाचनपछि वि.सं. २०१६ मा नेपालको पहिलो जननिर्वाचित प्रधानमन्त्रीका रूपमा पदभार सम्हालेका थिए। प्रधानमन्त्रीका रूपमा उनले बिर्ता उन्मूलन, भूमि सुधार तथा जनमुखी नीति अगाडि बढाउँदै नेपाली समाजलाई समावेशी बनाउने प्रयास गरेका थिए। तर २०१७ पुस १ मा दरबारीय कदमबाट उनको सरकार अपदस्त भयो र उनी लामो समयसम्म बन्दी जीवन तथा निर्वासित जीवन बिताउन बाध्य भए।
राजनीतिक योगदानका साथै कोइरालाले नेपाली साहित्यमा समेत अमिट छाप छोडेका छन्। मनोवैज्ञानिक यथार्थवादी धाराका प्रवर्तकका रूपमा चिनिने कोइरालाका ‘तीन घुम्ती’, ‘सुम्निमा’, ‘नरेन्द्रदाई’ जस्ता चर्चित कृति प्रकाशित छन्। यिनले नेपाली साहित्यलाई विचार र मनोविज्ञानको गहिराइमा पुर्याएको मूल्याङ्कन गरिएको छ।
यसै अवसरमा आज बालुवाटारस्थित प्रधानमन्त्री निवासमा संस्कृति, पर्यटन तथा नागरिक उड्डयन मन्त्रालयद्वारा बिपी कोइराला राष्ट्रिय पुरस्कार प्रदान गरिएको पुरातत्व अधिकृत भीष्म बाँस्कोटाले जानकारी दिए। यस्तै, भूकम्पपछि पुनर्निर्माण गरिएको बिपी सङ्ग्रहालयमा उनको जीवनका दस्तावेज र ऐतिहासिक वस्तुहरूको अवलोकनका लागि सार्वजनिक पहुँच दिइएको छ। बिपीको मेलमिलाप र राष्ट्रिय एकताको विचार आज पनि सान्दर्भिक रहेको कार्यक्रममा वक्ताहरूले उल्लेख गरेका थिए। य
