• सुशिल बि क.( प्रहार संवाददाता ) दमौली, तनहुँ,१९ जेठ २०८२ सोमवार । नियमित यात्राका लागि सवारी नपाउँदा जनजीवन प्रभावित भएको भन्दै नेपाल विद्यार्थी संघ तनहुँ र नेपाल तरुण दल व्यास नगर समितिले संयुक्त रूपमा प्रमुख जिल्ला अधिकारी रामकृष्ण अधिकारी समक्ष ध्यानाकर्षण पत्र बुझाएका हुन्।
गण्डकी प्रदेश सरकारले लागू गरेको ‘राइड सेयरिङ र सेल्फ ड्राइभ’ सम्बन्धी नियमावलीप्रति असन्तुष्टि जनाउँदै यातायात व्यवसायीहरूले सुरु गरेको सार्वजनिक सवारी साधन बन्द र आन्दोलनका कारण सर्वसाधारण यात्रु र विद्यार्थीहरू मर्कामा परेको भन्दै विद्यार्थीहरुले प्रजिअ समक्ष ध्यानाकर्षण बुझाएका हुन्। न
आ ध्यानाकर्षण पत्रमा दैनिक विद्यालय, क्याम्पस जाने विद्यार्थीहरू तथा अत्यावश्यक सेवाका लागि आवतजावत गर्नुपर्ने नागरिकहरूलाई परेको समस्याप्रति चिन्ता व्यक्त गरिएको छ। समस्या दीर्घकालीन नबनोस् भनेर वार्ता र संवादमार्फत समाधान खोज्न सरकार र व्यवसायी पक्षलाई आग्रह गरिएको छ।
ध्यानाकर्षण पत्र बुझाउने टोलीमा नेपाल विद्यार्थी संघ तनहुँका अध्यक्ष आशिष कैनी, नेपाल तरुण दल व्यास नगर अध्यक्ष युवराज भण्डारीसहित विद्यार्थी र युवा नेताहरूको उपस्थिति रहेको थियो। उनीहरूले सार्वजनिक यातायात अवरुद्धजस्ता कदमले आम नागरिकको मौलिक हकमा हस्तक्षेप हुने भन्दै प्रशासनले तत्काल पहल गरेर लोकतान्त्रिक माध्यमबाट सहमति निर्माण गर्नुपर्ने माग समेत गरेका छन्।
