प्रत्येक वर्ष फागुन ७ गते प्रजातन्त्र दिवस नेपालमा मनाइन्छ। यो दिन नेपालमा प्रजातान्त्रिक शासन व्यवस्थाको स्थापनाका लागि लडिएको संघर्षको स्मरणमा मनाइन्छ। विशेष गरी २००७ साल फाल्गुन ७ गते नेपालमा राणा शासन अन्त्य भई प्रजातान्त्रिक व्यवस्था स्थापनाको घोषणा भएको दिन भएकाले यसलाई ऐतिहासिक दिनका रूपमा लिइन्छ।
नेपालमा झण्डै १०४ वर्षसम्म निरंकुश राणा शासन कायम थियो। २००७ सालको क्रान्तिपछि राणाहरूको एकतन्त्र अन्त्य भई प्रजातन्त्रको स्थापना भयो । प्रजातन्त्रको स्थापनासँगै नेपाली नागरिकले अभिव्यक्ति स्वतन्त्रता, समानता, शिक्षालगायतका मौलिक अधिकार प्राप्त गरे। नेपालमा विधिको शासन स्थापित गर्ने प्रक्रियाको थालनी भयो, जसले नागरिकलाई कानुनी रूपमा संरक्षण गर्यो । २००७ सालको क्रान्ति र प्रजातन्त्रको स्थापनाले नेपालमा लोकतन्त्रको जग बसायो, जसले देशलाई प्रजातान्त्रिक मूल्य र मान्यतामा अघि बढ्न मद्दत गर्यो ।
प्रजातन्त्र आएपछि समाजमा शिक्षा, स्वास्थ्य, राजनीतिक सचेतना, आर्थिक सुधार, महिला अधिकार जस्ता क्षेत्रहरूमा परिवर्तन देखा पर्यो।
नेपाल सरकारले प्रत्येक वर्ष प्रजातन्त्र दिवसको अवसरमा विशेष कार्यक्रमहरू आयोजना गर्छ, जसमा नेताहरू, नागरिक समाज, विद्यार्थी, सरकारी अधिकारीहरू , पत्रकार लगायत सहभागी हुन्छन्। हामी सबैलाई लोकतन्त्रको रक्षा गर्न प्रेरित गर्ने महत्वपूर्ण दिन आज फागुन ७ गते परेको प्रजातन्त्र दिवसको शुभकामना ।
