• विजय अधिकारी (संवाददाता) लमजुङ,३ पुस २०८१ बिहीवार । लमजुङ जिल्लामा यस वर्ष धान उत्पादनमा वृद्धि भए पछि यहाँका किसानहरू उत्साहित भएका छन् ।
उन्नत वा हाइब्रिड जातका गुणस्तरीय धानको बिउको प्रयोग, अनुकूल मौसम लगायतका कारणले धान उत्पादन बढेको हो । जिल्लामा यस वर्ष ३१ हजार १ सय ५८ मेट्रिकटन धान उत्पादन भएको जिल्ला कृषि ज्ञान केन्द्र लमजुङले जनाएको छ ।
गत वर्ष यहाँ २८ हजार ६ सय ४७ मेट्रिकटन धान उत्पादन भएको थियो । गत वर्षको तुलनामा २ हजार ५ सय ११ मेट्रिकटन धान उत्पादन वृद्धि भएको कृषि ज्ञान केन्द्र कृषि प्रसार अधिकृत सरोज थापाले जानकारीले बताए ।
उनका अनुसार-गुणस्तरीय र उन्नत जातका बीउको प्रयोग, अनुकूल मौसम, मलको उपलब्धता लगायतका कारण धान उत्पादन बढेको हो । ‘केही स्थानामा धान पसाउने बेला रोग, कीराको समस्या देखिए पनि समग्र जिल्ला भर उत्पादन बढेको छ ।’ – थापाले भने । किसानले उन्नत जातको बीउको प्रयोग गर्नु, यस वर्ष प्रयाप्त सिँचाइ, आधुनिक प्रविधिको प्रयोग लगायत कारणले उत्पादनमा वृद्धि आएको थापाको भनाइ छ।
यस वर्ष जिल्लामा ९ हजार ३ सय १ हेक्टर क्षेत्रफलमा धानखेती गरिएको छ । केन्द्रका अनुसार आ.व.२०७९/८० मा ३० हजार ९ सय ८६ मेट्रिकटन, आ.व. २०७८/७९ मा ३० हजार ६ सय ९८ मेट्रिकटन, आ.व. २०७७/७८ मा ४४ हजार ४ सय २५ मेट्रिकटन, आ.व.२०७६/७७ मा ४४ हजार १ सय ५५ मेट्रिकटन, आ.व. २०७५/७६ मा ४४ हजार ५ सय ४५ मेट्रिकटन आ.व. २०७४/७५ मा ४३ हजार ८ सय ३० मेट्रिकटन धान उत्पादन भएको थियो ।
जिल्लामा साबित्री, रामधान, सुक्खा-१, सुक्खा-२, सुक्खा-३, लोकतन्त्र, सुनौलो सुगन्ध जस्ता उन्नत जातका धानका बिउको प्रयोग गरिएको थियो ।
