प्रहर समाचार । काठमाडौं, २५ असोज २०८३ आइतबार । अर्जेन्टिनाको राष्ट्रिय टोलीबाट भावुक बिदाइ लिएको केही दिनमै लियोनल मेस्सीले क्लब फुटबलमा गोलको वर्षा गरेका छन्। मेस्सीको दोस्रो हाफमा दुई गोल र लुइस सुआरेजको पहिलो हाफका दुई गोलको मद्दतमा इन्टर मियामीले अमेरिकी मेजर लिग सकर (एमएलएस) अन्तर्गत डीसी युनाइटेडलाई ४–० ले धुलो चटाएको छ।
शनिबार राति भएको खेलमा सुआरेजले तेस्रो र ३९औँ मिनेटमा गोल गर्दा मेस्सीले ४७औँ र ६०औँ मिनेटमा जाली चुमाए। राष्ट्रिय टोलीबाट बिदाइको भावुक क्षण बिताएको केही दिनमै मैदानमा फर्किएका मेस्सीले आफ्नो गोल गर्ने धार अझै नखुइलिएको सन्देश दिएका छन्। दोस्रो हाफ सुरु भएको दुई मिनेटमै सुआरेजको पासलाई सदुपयोग गर्दै गोल गरेका मेस्सीले ६०औँ मिनेटमा आफ्नो व्यक्तिगत कौशलको नमुना पेस गरे। रोड्रिगो डी पाउलको पासमा विपक्षीको पेनाल्टी क्षेत्रमा बल अघि बढाएका उनले दुई रक्षकलाई छक्याउँदै करिब १२ यार्डबाट गरेको सटिक प्रहारलाई गोलमा परिणत गरे। उनको उक्त गोलले मैदानमा उपस्थित दर्शक र समर्थकलाई रोमाञ्चित बनायो। मेस्सी र सुआरेजको समान दुई–दुई गोलसँगै इन्टर मियामीले पाँच खेलदेखिको जितविहीन यात्रामा पूर्णविराम लगाएको छ।
मेस्सीले जारी एमएलएस सिजनमा आफ्नो गोल संख्या २३ पुर्याउँदै सर्वाधिक गोलकर्ताको स्थानसमेत कायम राखेका छन्।अर्जेन्टिनाका लागि २१ वर्ष लामो अन्तर्राष्ट्रिय यात्रामा २०८ खेल खेल्दै १२६ गोल गरेका मेस्सीले राष्ट्रिय टोलीबाट बिदाइपछि पनि आफ्नो प्रभाव कम नभएको देखाएका छन्। अक्टोबर ६ मा बेनिनविरुद्धको मैत्रीपूर्ण खेलमा एक गोल र दुई गोलका अवसर सिर्जना गरेका उनले क्लब फुटबलमा फर्किएलगत्तै दुई गोल थपे। उमेरले ३९ वर्ष पुगे पनि उनको बलमाथिको नियन्त्रण, रक्षकलाई छक्याउने कला र निर्णायक प्रहारले समर्थकलाई अझै मन्त्रमुग्ध बनाइरहेको छ। अर्जेन्टिनाको जर्सीमा एउटा ऐतिहासिक अध्यायको अन्त्यतर्फ अघि बढेका मेस्सीले इन्टर मियामीको जर्सीमा भने गोल र कीर्तिमानको यात्रा जारी राखेका छन्।
