प्रहार समाचार । काठमाडौं, २१ असोज २०८३ बुधबार । नेपाली कांग्रेसको १५औँ महाधिवेशनमा सुदूरपश्चिमबाट युवा महिला नेतृ भूपेश्वरी ऐर ‘भूपी’ले केन्द्रीय सदस्य पदमा उम्मेदवारी घोषणा गरेकी छन्। ३५ वर्षमुनिको युवा महिला प्रतिनिधित्व गर्दै केन्द्रीय नेतृत्वमा पुग्ने लक्ष्यसहित उनले अघि सारेको दाबेदारीले कांग्रेसभित्र पुस्तान्तरण, युवा सहभागिता र महिला नेतृत्वको प्रश्नलाई थप बहसमा ल्याएको छ।
ऐरले सुदूरपश्चिमको आवाजलाई राष्ट्रिय राजनीतिको केन्द्रसम्म पुर्याउने, युवा पुस्ताको ऊर्जा उपयोग गर्ने र महिलालाई निर्णायक भूमिकामा स्थापित गर्ने विषयलाई आफ्नो प्राथमिकतामा राखेकी छन्।पद्मकन्या बहुमुखी क्याम्पसको स्वतन्त्र विद्यार्थी युनियन (स्ववियु) सभापतिको अनुभव बोकेकी ऐरले २०८१ चैतमा भएको निर्वाचनमा ७३० मत प्राप्त गर्दै सभापतिमा निर्वाचित भएकी थिइन्। उनले नेविसंघकी आधिकारिक उम्मेदवार पूर्णिमाया परियारलाई पराजित गरेकी थिइन्। विद्यार्थी राजनीतिबाट नेतृत्वको मैदानमा स्थापित भएकी ऐरले अब त्यही अनुभवलाई पार्टीको मूल राजनीतिक संरचनासम्म लैजाने दाबी गरेकी छन्।
ऐरको उम्मेदवारीको राजनीतिक सन्देश ‘युवा पुस्ता केवल मतदाता र नाराको विषय होइन, नेतृत्वको हिस्सेदार हुनुपर्छ’ भन्नेमा केन्द्रित देखिन्छ। उनले कांग्रेसमा नयाँ सोच, नयाँ ऊर्जा र पुस्तान्तरण आवश्यक रहेको उल्लेख गर्दै संगठन तथा जनताको पक्षमा इमानदारी, सक्रियता र जिम्मेवारीका साथ काम गर्ने प्रतिबद्धता जनाएकी छन्। सुदूरपश्चिमबाट ३५ वर्षमुनिको युवा महिला प्रतिनिधित्व गर्दै केन्द्रीय सदस्यका लागि अघि सरेकी ऐरले आफ्नो अपिलमा ‘तपाईंको एक मत नयाँ पुस्ताको आवाजका लागि’ भन्दै महाधिवेशन प्रतिनिधिसँग समर्थनको अपेक्षा गरेकी छन्।
पद्मकन्यामा संगठनगत दबाबका बीच स्वतन्त्र उम्मेदवारी दिएर प्यानलसहित विजयी भएको उनको विगतलाई हेर्दा यसपटकको केन्द्रीय सदस्य पदको दाबेदारीलाई पनि स्थापित राजनीतिक अभ्यासभित्र नयाँ पुस्ताको स्थान खोज्ने प्रयासका रूपमा लिन सकिन्छ। ऐरले कांग्रेसको परम्परालाई सम्मान गर्दै परिवर्तनको संकल्पसहित युवा र महिलालाई नेतृत्वको केन्द्रमा पुर्याउने एजेन्डा अघि सारेकी छन्।
