प्रहार समाचार । काठमाडौं, १९ असोज २०८३ सोमबार । नेपाली कांग्रेसको १५औँ महाधिवेशन अब उद्घाटनको औपचारिकताबाट निर्णयको चरणमा प्रवेश गरेको छ। आजदेखि सुरु हुने बन्दसत्रमा नेतृत्वका राजनीतिक दृष्टिकोण, संगठनको अवस्था र पार्टीको आगामी दिशामाथि बहस हुने भएको छ।
बन्दसत्रअघि बिहान १० बजे केन्द्रीय कार्यसमितिको बैठक बस्नेछ भने सभापति गगनकुमार थापाले राजनीतिक प्रतिवेदन, महामन्त्रीले विधान संशोधनसम्बन्धी प्रतिवेदन र कोषाध्यक्षले आर्थिक प्रतिवेदन पेस गर्ने कार्यतालिका छ। करिब सात हजारभन्दा बढी महाधिवेशन प्रतिनिधि सहभागी हुने बन्दसत्र कांग्रेसको आगामी राजनीतिक दिशा र नेतृत्वको प्राथमिकता परीक्षण गर्ने महत्वपूर्ण मञ्च बन्नेछ।बन्दसत्रसँगै कांग्रेसभित्र नेतृत्व चयनको वास्तविक प्रतिस्पर्धा पनि अघि बढ्दैछ। आज साँझ ५ बजे मतदाता नामावली प्रकाशनदेखि निर्वाचन प्रक्रिया सुरु हुनेछ।
असोज २० गते बिहान १० बजेदेखि दिउँसो ३ बजेसम्म उम्मेदवारी मनोनयन, त्यसपछि दाबी–विरोध र नामावली प्रकाशनको प्रक्रिया अघि बढ्नेछ। असोज २१ गते बिहान ९ बजेसम्म उम्मेदवारी फिर्ता लिन सकिनेछ र बिहान १० बजे अन्तिम उम्मेदवारको नामावली सार्वजनिक गरिनेछ। त्यसपछि उम्मेदवारहरूले दिनभर प्रचारप्रसार गर्ने समय पाउनेछन्।
अब कांग्रेसको महाधिवेशन भाषण र नाराभन्दा मतपत्रको निर्णयतर्फ अघि बढेको छ। असोज २२ गते बिहान ७ बजेदेखि साँझ ५ बजेसम्म राष्ट्रिय सभा गृह, खुलामञ्च र प्रज्ञा भवनमा मतदान हुनेछ। मतदान सकिएलगत्तै मतगणना सुरु गरिने निर्वाचन समितिले जनाएको छ। बन्दसत्रले प्रस्तुत गर्ने विचार र दस्तावेजले पार्टीको राजनीतिक दिशा देखाउनेछ भने मतदानले त्यस दिशालाई अघि बढाउने नेतृत्व चयन गर्नेछ—अर्थात् कांग्रेसभित्रको बहस अब मञ्चबाट मतपेटिकातर्फ सर्दैछ।
