प्रहार समाचार । काठमाडौं, ३० भदौ २०८३ मङ्गलबार । मनसुनको न्यूनचापीय रेखा सरदर स्थानभन्दा दक्षिणतर्फ रहेसँगै देशका केही भूभागमा आज भारी वर्षाको सम्भावना देखिएको छ । जल तथा मौसम विज्ञान विभागका अनुसार दिउँसो कोसी, वाग्मती र गण्डकी प्रदेशका हिमाली तथा पहाडी भूभागका एक–दुई स्थानमा भारी वर्षा हुनसक्ने भएकाले बाढी, पहिरो तथा सडक यातायातमा असर पर्न सक्ने क्षेत्रमा सतर्कता आवश्यक देखिएको छ । तस्बिर : प्रहार अनलाइन मिडिया
आज देशभर सामान्यतया बादल लाग्नेछ भने कोसी, वाग्मती र गण्डकीका हिमाली भूभागका केही स्थान तथा लुम्बिनी, कर्णाली र सुदूरपश्चिमका हिमाली क्षेत्रमा वर्षा तथा हिमपातको सम्भावना रहेको विभागले जनाएको छ । पहाडी भूभागका केही स्थानमा मध्यम वर्षा हुनसक्नेछ भने वाग्मती, गण्डकी र लुम्बिनीका तराई भूभागका केही स्थान तथा मधेस, कोसी र सुदूरपश्चिमका तराई क्षेत्रमा समेत मध्यम वर्षाको सम्भावना रहेको छ ।राति पनि वर्षाको क्रम कायमै रहने पूर्वानुमान छ ।
यस्तै कोसी प्रदेशका पहाडी तथा तराई भूभागका एक–दुई स्थानमा आज भारी वर्षा हुनसक्ने विभागले जनाएको छ । कोसी, वाग्मती र गण्डकीका हिमाली तथा पहाडी भूभागमा केही स्थानमा तथा लुम्बिनी, कर्णाली र सुदूरपश्चिमका हिमाली–पहाडी क्षेत्रमा थोरै स्थानमा मध्यम वर्षा वा हिमपात हुनसक्ने भएकाले वर्षाका कारण जोखिममा रहेका क्षेत्रका बासिन्दालाई आवश्यक सावधानी अपनाउन मौसम विभागले संकेत गरेको छ ।
