प्रहार समाचार । चैत्र ९ गते सोमबार । अमेरिकी राष्ट्रपति Donald Trump ले आफ्नो सामाजिक सञ्जालमार्फत इरानलाई कडा चेतावनी दिँदै हर्मुज जलसन्धिमा लगाइएको अवरोध तत्काल नहटाए इरानका विद्युत उत्पादन केन्द्रहरू ध्वस्त पारिने बताएका छन्।फेब्रुअरी २८ देखि सुरु भएको अमेरिका–इजरायल र इरानबीचको द्वन्द्वका कारण इरानले विश्वव्यापी ऊर्जा आपूर्तिका लागि अत्यन्त महत्वपूर्ण मानिने हर्मुज जलसन्धिमा अवरोध सिर्जना गरेको हो। विश्वको करिब २० प्रतिशत तेल तथा ग्यास यही मार्ग हुँदै ओसारपसार हुने गर्दछ।
ट्रम्पको उक्त अभिव्यक्तिपछि इरानी सेनाले पनि कडा प्रतिक्रिया जनाउँदै, यदि अमेरिकाले आफ्ना पावर प्लान्टमा आक्रमण गरेमा हर्मुज जलसन्धिलाई ‘स्थायी रूपमा’ बन्द गरिने चेतावनी दिएको छ। साथै, क्षेत्रमा रहेका अमेरिकी सैन्य आधार तथा ऊर्जा पूर्वाधारहरूलाई निशाना बनाइने पनि जनाएको छ।जलसन्धिमा अवरोध भएपछि अन्तर्राष्ट्रिय बजारमा कच्चा तेलको मूल्यमा तीव्र वृद्धि भएको छ। ब्रेन्ट क्रुडको मूल्य प्रति ब्यारेल ११२ डलरसम्म पुगेको छ भने अमेरिकामा पेट्रोलको मूल्य चार वर्षयताकै उच्च स्तरमा पुगेको छ।यसबीच, इरानको प्रमुख ऊर्जा संरचना ‘बुशेर आणविक ऊर्जा केन्द्र’ ट्रम्पको सम्भावित निशानामा पर्न सक्ने आकलन गरिएको छ।
तर, मानवअधिकारवादी संस्थाहरूले यस्ता नागरिक पूर्वाधारमाथिको आक्रमणले गम्भीर मानवीय संकट निम्त्याउन सक्ने भन्दै चिन्ता व्यक्त गरेका छन्।उता, इजरायलका प्रधानमन्त्री Benjamin Netanyahu ले हालै दक्षिण इजरायलमा भएको इरानी मिसाइल आक्रमणको बदला लिने बताएका छन्। उक्त आक्रमणमा १०० भन्दा बढी मानिस घाइते भएका थिए।
