प्रहार समाचार । काठमाडौँ, २९ फागुन २०८२ शुक्रबार । नेपाल विश्व व्यापार संगठन (World Trade Organization) (डब्ल्युटीओ) अन्तर्गतको व्यापार तथा वातावरण समितिको अध्यक्षमा सर्वसम्मत रूपमा चयन भएको छ। संयुक्त राष्ट्रसंघ तथा अन्य अन्तर्राष्ट्रिय संघ–संस्थाका लागि जेनेभास्थित नेपालको स्थायी नियोगका अनुसार फागुन २७ गते बसेको महासभा बैठकले नेपाललाई एक वर्षे कार्यकालका लागि उक्त समितिको अध्यक्षको जिम्मेवारी दिएको हो।
व्यापार तथा वातावरण समिति डब्ल्युटीओ सदस्य राष्ट्रहरूबीच व्यापार नीतिले वातावरणमा पार्ने प्रभाव तथा वातावरणीय नीतिले अन्तर्राष्ट्रिय व्यापारमा पार्ने असरबारे छलफल गर्ने महत्वपूर्ण मञ्च हो। समितिमा जलवायु परिवर्तन, हरित अर्थतन्त्र, वातावरणमैत्री उत्पादन तथा दिगो व्यापारसँग सम्बन्धित विषयमा सदस्य राष्ट्रहरूबीच नीति संवाद र सहकार्य हुने गर्दछ।
अल्पविकसित राष्ट्रको सूचीबाट क्रमशः बाहिरिने तयारीमा रहेको नेपालका लागि यस्तो जिम्मेवारीलाई महत्वपूर्ण कूटनीतिक उपलब्धिका रूपमा हेरिएको छ। जेनेभास्थित नेपालको स्थायी नियोगका अनुसार संयुक्त राष्ट्रसंघका लागि नेपालका स्थायी प्रतिनिधि Ram Prasad Subedi ले उक्त समितिमा नेपालको प्रतिनिधित्व गर्नेछन्। नेपालको नेतृत्वमा समितिले आगामी एक वर्ष व्यापार र वातावरणबीच सन्तुलन कायम गर्ने विषयमा सदस्य राष्ट्रहरूबीच सहकार्य अघि बढाउने अपेक्षा गरिएको छ।
