प्रहार समाचार । तनहुँ, १४ पुस २०८२ सोमबार । लोकसंस्कृति संरक्षण र नयाँ पुस्तामा मौलिक गायन शैली हस्तान्तरण गर्ने उद्देश्यले व्यास नगर प्रज्ञा प्रतिष्ठान, दमौली, तनहुँको आयोजनामा ठाडोभाका लोकगीत प्रशिक्षण कार्यक्रम सञ्चालन हुने भएको छ।
‘लोक संस्कृतिको उत्थान एवम् संरक्षण- हाम्रो अभियान” भन्ने नाराका साथ यही पौष १७ गतेदेखि १९ गतेसम्म दमौली सभाहलमा प्रशिक्षण सञ्चालन गरिने प्रतिष्ठानले जनाएको छ।उक्त प्रशिक्षण कार्यक्रममा बुद्धिमान दुरा (धम्पु) प्रमुख प्रशिक्षकका रूपमा र सहायक प्रशिक्षकमा सिता दुरा रहने छन्। कार्यक्रमको दुरा सेवा समाज जिल्ला कार्यसमिति, तनहुँले सहजीकरण गर्नेछ । यसका साथै प्राविधिक सहयोगमा ठाडो भाका लोककला प्रतिष्ठान नेपालको भूमिका रहने छ । उक्त कार्यक्रम राष्ट्रिय लोक तथा दोहोरी गीत प्रतिष्ठान नेपाल जिल्ला कार्यसमिति, तनहुँको सह–आयोजनामा हुने छ । क
व्यास नगरपालिकाभित्र बसोबास गर्ने सबै जातजाति तथा समुदायका इच्छुक व्यक्तिहरूलाई लक्षित गरी आयोजना गरिएको उक्त प्रशिक्षणमा ठाडोभाका लोकगीतको सैद्धान्तिक र व्यवहारिक ज्ञान प्रदान गरिनेछ। लोपोन्मुख बन्दै गएको ठाडोभाकालाई जीवन्त राख्न र स्थानीय प्रतिभा उत्पादन गर्न यो कार्यक्रम महत्वपूर्ण हुने अपेक्षा गरिएको छ।
कार्यक्रमबारे जानकारी दिँदै प्राज्ञ देवीबहादुर बस्नेतले सहभागी हुन चाहने व्यक्तिले २०८२ साल पौष १६ गते अपरान्ह ४ बजेसम्म व्यास नगर प्रज्ञा प्रतिष्ठानमा सम्पर्क राख्न आग्रह गरेको छ। स व्यास नगर प्रज्ञा प्रतिष्ठानका सदस्य सचिव केदार आचार्यका अनुसार यस किसिमका सांस्कृतिक कार्यक्रमले स्थानीय पहिचान सुदृढ गर्नुका साथै भावी पुस्तालाई मौलिक संस्कृतिसँग जोड्ने विश्वास लिइएको छ।
