प्रहार समाचार । तनहुँ, ७ कार्तिक २०८२ शुक्रवार । तनहुँ जिल्लामा आजको दिन दुर्भाग्यपूर्ण रह्यो। पृथ्वीराजमार्ग र आसपासका भित्री सडकहरूमा दिनभरि भएका सवारी दुर्घटनाले जिल्लावासीलाई स्तब्ध पारेका छन्। बिहानैदेखि बेलुकीसम्म भएका आठवटा छुट्टाछुट्टै दुर्घटनामा दुई दर्जनभन्दा बढी व्यक्ति घाइते भएका छन्। सौभाग्यवश, कुनै जनहानि नभए पनि अधिकांश घाइतेको अवस्था मध्यम रहेको प्रहरीले जनाएको छ।
सबैभन्दा पहिले बिहान ६:४५ बजे डुम्रेमामा भएको मोटरसाइकल दुर्घटनाबाट दिनको दुःखद श्रृंखला सुरु भयो। त्यसपछि बेलचौतारा, थर्पु, आँबुखैरेनी, भिमाद र बन्दिपुरसम्म सवारी साधनहरू एकपछि अर्को दुर्घटनामा परे। पृथ्वीराजमार्गको व्यस्तता र चालकहरूको लापरबाहीले यी घटनाहरू घटेको अनुमान प्रहरीले गरेको छ। विशेषगरी थर्पुमा भएको बस दुर्घटनामा एकैपटक १२ जना सवारहरू घाइते हुँदा स्थानीय अस्पतालमा चाप बढेको थियो।
दिउँसो आँबुखैरेनी र बेलचौतारामा भएका दुर्घटनामा मोटरसाइकल र कारका ठक्करले पैदलयात्रीसमेत घाइते भएका छन्। घाइतेहरू मध्ये धेरैजसोको टाउको, हात र खुट्टामा चोट लागेको छ भने केहीलाई थप उपचारका लागि पोखरा र भरतपुरका अस्पताल पठाइएको छ। प्रहरीले घाइतेहरूको उपचारमा सक्रिय समन्वय गरिरहेको जनाएको छ।
साँझतिर भिमाद र बन्दिपुर क्षेत्रमा पुनः दुईवटा दुर्घटना हुँदा स्थिति झन् तनावग्रस्त बन्यो। बन्दिपुरको टिप्लेमा भएको स्कुटर दुर्घटनामा दुई जना घाइतेलाई राति नै भरतपुरस्थित CMC अस्पताल रिफर गरिएको थियो। प्रहरीका अनुसार असावधानी र सडकमा भएका अत्याधिक घुम्ति मोड तथा चिप्लिने अवस्थाले पनि दुर्घटनाका कारण हुनसक्छ।
