प्रहार समाचार । कैलाली, ७ कात्तिक २०८२ शुक्रवार । कैलालीको जानकी गाउँपालिका–५ पथरैया गुजरुवा नजिकै रानी जमरा कुलरिया सिँचाइ आयोजनाअन्तर्गतको कुलरिया नहरमा नुहाउने क्रममा तीन बालिकाको डुबेर मृत्यु भएको छ ।
इलाका प्रहरी कार्यालय टीकापुरका प्रमुख प्रहरी नायब उपरीक्षक प्रकाश डाँगीका अनुसार टीकापुर नगरपालिका–१ ब्लक नं. १५ की जुम्ल्याहा दिदीबहिनी निशा बजगाई र मानुषी बजगाई तथा जानकी गाउँपालिका–५ की सुलोचना तिमिल्सैनाको ज्यान गएको हो। ती तीनै बालिका आइतबार दिउँसो नहरमा नुहाउने क्रममा डुबेका थिए।
डीएसपी डाँगीका अनुसार निशा र मानुषी आफन्तकहाँ गएका बेला नहरमा पुगेका थिए भने उनीहरूसँगै नुहाउन गएकी सुलोचना पनि उद्धार हुन नसकेकी हुन्। स्थानीयवासी र प्रहरीको सहयोगमा उद्धार प्रयास भए पनि तीनै जनाको ज्यान बचाउन सकिएन। शव परीक्षणका लागि टीकापुर अस्पतालमा राखिएको प्रहरीले जनाएको छ।
तीनै बालिका विद्यार्थी थिए — निशा र मानुषी टीकापुरस्थित जनजागृति माध्यमिक विद्यालय सीतापुरमा कक्षा पाँचमा अध्ययनरत थिइन् भने सुलोचना जानकी गाउँपालिका–१ दुर्गौलीस्थित सरस्वती माध्यमिक विद्यालयमा कक्षा चारमा पढ्थिन्। घटनापछि गाउँमा शोकमग्न वातावरण छ। स्थानीय प्रशासनले नहर क्षेत्र आसपासमा सुरक्षा सचेतना अभिवृद्धि गर्ने तयारी थालेको जनाएको छ।
