प्रहार समाचार । तनहुँ, ६ कात्तिक २०८२ बिहीवार । नेपालभर आज तिहारको मुख्य दिन भाइटीका हर्षोल्लासका साथ मनाइँदैछ। घरघरमा मखमली, सयपत्री र गोदावरी फूलका गन्धले वातावरण सुवासित बनेको छ भने दिदीबहिनीहरूले आफ्ना दाजुभाइलाई दीर्घायु, आरोग्य र ऐश्वर्यको कामना गर्दै पञ्चरङ्गी वा सप्तरङ्गी टीका लगाइरहेका छन्। प्रेम, स्नेह र पारिवारिक एकताको प्रतीक यो पर्व यमद्वितीया वा भाइटीका नामले पनि परिचित छ, जसले तिहारको अन्तिम दिनलाई अझ विशेष बनाएको छ।
नेपाल पञ्चाङ्ग निर्णायक विकास समितिका अनुसार यस वर्ष तिथि वृद्धि भएकाले भाइटीका तिहारको छैटौँ दिन परेको हो। समितिले साइत खोज्नेका लागि बिहान ११ः३९ बजेको अभिजित् मुहूर्तलाई उत्तम समय बताएको छ। शास्त्रीय परम्परा अनुसार दिदीबहिनी पूर्वतर्फ र दाजुभाइ पश्चिमतर्फ फर्की टीका लगाउनुपर्ने मान्यता छ, जसले तुला राशिमा रहेका पश्चिमका चन्द्रमालाई सम्मुख पार्ने बताइन्छ। यस दिन दिदीबहिनीहरूले अष्ट चिरञ्जीवी र यमराजदेखि नवग्रहसम्मको पूजा गरी दाजुभाइलाई तेलको धाराले छेकेर टीका, माला र आशिष दिइरहेका छन्।
टीका लगाइसकेपछि दिदीबहिनीले दाजुभाइलाई सेलरोटी, मसला, ओखर र कटुसजस्ता परम्परागत परिकार अर्पण गर्छन् भने दाजुभाइले पनि गच्छेअनुसार सौभाग्यका प्रतीक उपहार र दक्षिणा प्रदान गर्छन्। रङ्ग, संगीत र स्नेहले भरिएको भाइटीका केवल धार्मिक अनुष्ठान होइन—यो नेपाली समाजको प्रेम, आदर र पारिवारिक बन्धनको अनुपम प्रतीक हो, जसले वर्षभरको सम्बन्धमा नयाँ ऊर्जाको रंग भर्ने गर्दछ।
