प्रहार समाचार । काठमाडौँ, २४ असोज २०८२ शुक्रवार । यस वर्षको नोबेल शान्ति पुरस्कार भेनेजुएलाकी प्रखर प्रजातन्त्रवादी नेतृ मारिआ कोरिना मचाडोलाई प्रदान गरिने भएको छ। नर्वेली नोबेल समिति अनुसार मचाडोले देशमा लोकतन्त्र पुनःस्थापनाको अभियानमा असाधारण आँट र प्रतिबद्धता प्रदर्शन गरेकी छन्। तीव्र दमन, धम्की र गिरफ्तारीको जोखिमबीच उनले जनताको स्वतन्त्रता, मानव अधिकार र विधिको शासनका पक्षमा आवाज उठाइरहेकी छन्।
मचाडो भेनेजुएलाको संसदकी पूर्व सदस्य हुन् र नागरिक निगरानी संस्था Súmate की सह-संस्थापक हुन्। सन् २०२३ मा उनले विपक्षी दलको साझा उम्मेदवारको हैसियतमा राष्ट्रपति चुनावमा प्रतिस्पर्धा गर्ने तयारी गरेकी थिइन्, तर सत्तारूढ पक्षद्वारा अयोग्य घोषित गरिएपछि उनी भूमिगत भएकी हुन्। नोबेल समितिले मचाडोलाई “तानाशाही शासनबाट शान्तिपूर्ण राजनीतिक संक्रमणका लागि प्रेरणादायी नेतृ”को रूपमा सम्मान गरेको छ।
नोबेल शान्ति पुरस्कारसँगै मचाडोलाई प्रमाणपत्र, पदक र करिब ९ लाख स्विडिश क्रोनर (SEK) राशिको पुरस्कार प्रदान गरिनेछ। नोबेल समारोह आगामी डिसेम्बर १०, २०२५ मा नर्वेको ओस्लो शहरमा आयोजना हुनेछ। यो पुरस्कारले भेनेजुएलामा लोकतान्त्रिक आन्दोलनलाई थप अन्तर्राष्ट्रिय समर्थन र विश्वसनीयता दिलाउने विश्वास गरिएको छ। – सम्पादित श्रोत BBC
