प्रहार समाचार । काठमाडौँ, १२ असार २०८२ देशका विभिन्न जिल्लाबाट प्रहरीले ठूलो परिमाणमा अवैध लागूऔषध बरामद गर्दै २० भन्दा बढी व्यक्तिलाई नियन्त्रणमा लिएको छ। बुधबार दिउँसो र बेलुका देशका झन्डै एक दर्जन जिल्लामा गरिएको अपरेशन अन्तर्गत खैरो हेरोइन, ब्राउनसुगर, चरेश, गाँजा तथा नियन्त्रण गरिएको औषधीसहित प्रहरीले ट्रक, बस, मोटरसाइकल र कार प्रयोग गर्नेहरूलाई समेत पक्राउ गरेको हो।
मोरङको विराटनगर–१५ मा भारतबाट नेपालतर्फ आउँदै गरेका धरानका संकलन राई र आशिष विक खैरो हेरोइन जस्तो देखिने ३.३६ ग्राम पदार्थसहित मोटरसाइकलमा पक्राउ परेका छन्। त्यस्तै झापाको भद्रपुर–७ र ५ का दुई फरक स्थानबाट ब्राउनसुगर जस्तो देखिने २०० ग्रामभन्दा बढी लागूऔषधसहित नुवाकोटका चार युवा र रामधुनीका एक किशोरसहित दुई जना पक्राउ परेका छन्।
सिराहाको भगवानपुर–४ बाट भारत बिहारका दुई नागरिकलाई करिब ४० ग्राम ब्राउनसुगरसहित, नवलपरासी पश्चिमको सौवाटिकरबाट ८–८ एम्पुल बुप्रेनोर्फिन, फेनारगन र डाइजेपामसहित बुटवलका दुई युवालाई प्रहरीले नियन्त्रणमा लिएको छ। सुनसरीको बराहक्षेत्र–८ बाट मोटरसाइकलमा गाँजा ओसार्दै गरेका उदयपुरका दुई युवा पनि पक्राउ परेका छन् भने बाराको पथलैया चोकबाट १ किलो ९३३ ग्राम चरेश, ठूलो परिमाणको नेपाली तथा भारतीय नगदसहित एक जना नियन्त्रणमा लिइएको छ।
यसबाहेक पर्साको परवानीपुर चोकबाट ट्रकमा लुकाइएका करिब ३ क्विन्टल १९ किलो चरेश र १ लाख ९२ हजार रुपैयाँसहित चालकलाई, बर्दियाको बढैयाताल–७ बाट २ ग्राम ब्राउनसुगरसहित बाँकेका दुई युवकलाई पनि प्रहरीले नियन्त्रणमा लिएको छ। सबै घटनामा संलग्नविरुद्ध लागूऔषधसम्बन्धी कसुरमा अनुसन्धान अगाडि बढाइएको प्रहरीले जनाएको छ।
