प्रहार समाचार । तनहुँ, २८ जेठ २०८३ बिहीबार । तनहुँको व्यास नगरपालिका–१३ का युवाहरूले सामुदायिक उत्तरदायित्व र सामाजिक सचेतनाको उत्कृष्ट उदाहरण प्रस्तुत गर्दै कालिका मन्दिर परिसरमा सरसफाइ अभियान सञ्चालन गरेका छन्। पछिल्लो समय समाजमा युवापुस्तालाई विभिन्न नकारात्मक गतिविधिसँग जोडेर हेर्ने प्रवृत्ति बढिरहेका बेला वडा नं. १३ का युवाहरूले भने श्रम, अनुशासन र सामाजिक सेवामार्फत सकारात्मक सन्देश प्रवाह गरेका हुन्।
अभियन्ता अविनाश पन्थको नेतृत्वमा सागर विक, विनोद गैहे र कुशल परियारलगायत युवाहरूले मन्दिर परिसरमा जम्मा भएका फोहोर संकलन गरी सरसफाइ गरेका थिए। धार्मिक तथा पर्यटकीय महत्व बोकेको मन्दिर क्षेत्र स्वच्छ, सफा र व्यवस्थित राख्न युवाहरूले देखाएको सक्रियता स्थानीयवासीका लागि समेत प्रेरणादायी बनेको छ।सरसफाइ अभियानका क्रममा युवाहरूले मन्दिर दर्शन तथा पूजा गर्न आउने सम्पूर्ण भक्तजनलाई मन्दिर परिसरको मर्यादा कायम राख्न आग्रह गरेका छन्।
उनीहरूले मन्दिर क्षेत्रमा मदिराजन्य पदार्थ सेवन, लागूऔषध प्रयोग तथा अन्य कुनै पनि अनुचित गतिविधि नगर्न अनुरोध गर्दै धार्मिक स्थलको गरिमा जोगाउनु सबैको साझा दायित्व भएको बताएका छन्। ‘समाज परिवर्तनका लागि ठूलो पद वा शक्ति आवश्यक पर्दैन, सकारात्मक सोच र सेवाभाव भए पुग्छ’ भन्ने सन्देश यी युवाहरूको अभियानले दिएको स्थानीयवासीको भनाइ छ। धार्मिक आस्था, वातावरण संरक्षण र सामाजिक जिम्मेवारीलाई एकसाथ जोड्दै गरिएको यस्तो अभियानले अन्य युवालाई समेत रचनात्मक कार्यमा सहभागी हुन प्रेरित गर्ने विश्वास गरिएको छ। स्थानीय तह र समुदायले पनि यस्ता सामाजिक अभियानलाई निरन्तर प्रोत्साहन गर्नुपर्ने आवश्यकता औंल्याइएको छ। सरसफाइ केवल एक दिनको कार्यक्रम नभई सभ्य समाज निर्माणको आधार भएकाले यसलाई सबै नागरिकको संस्कारका रूपमा विकास गर्नुपर्नेमा सहभागीहरूले जोड दिएका छन्।
