प्रहार समाचार । काठमाडौं, १७ फागुन २०८२ आइतबार । अमेरिका र इजरायलले संयुक्त रूपमा गरेको हवाई आक्रमणमा इरानका सर्वोच्च नेता अयातोल्लाह अली खामेनेईको मृत्यु भएको इरानी सरकारी मिडियाले आधिकारिक रूपमा पुष्टि गरेको छ। घटनापछि इरानभर शोकको माहोल छ, सुरक्षा सतर्कता उच्च बनाइएको छ। तस्बिर : एपिएफ
इरानी राज्य–नियन्त्रित मिडियाले खामेनेईको निधनलाई “राष्ट्रका लागि ठूलो क्षति” भन्दै प्रसारण गरेका छन्। ती रिपोर्टहरूमा आक्रमण लक्षित रूपमा गरिएको र खामेनेई बसोबास गर्ने क्षेत्र वरपर केन्द्रित भएको दाबी गरिएको छ। यद्यपि आक्रमणको ठ्याक्कै स्थान र समयबारे विस्तृत विवरण सार्वजनिक गरिएको छैन।
इरानी मिडियाका अनुसार आक्रमणमा खामेनेईका परिवारका सदस्य—छोरी, ज्वाइँ र नातीसमेत मारिएको दाबी गरिएको छ। यसबारे स्वतन्त्र पुष्टि भने हुन बाँकी छ। घटनापछि तेहरानसहित प्रमुख शहरहरूमा शोकसभा र कडा सुरक्षा व्यवस्था देखिएको छ।
खामेनेईको निधनको शोकमा इरान सरकारले ४० दिनको राष्ट्रिय शोक घोषणा गरेको छ। साथै, ७ दिन सार्वजनिक विदा दिने निर्णय गरिएको बताइएको छ। शोक अवधिभर राष्ट्रिय झण्डा आधा झुकाइने र सबै सार्वजनिक कार्यक्रम स्थगित गरिने जनाइएको छ।
यसअघि डोनाल्ड ट्रम्प ले सामाजिक सञ्जालमार्फत खामेनेई मारिएको उल्लेख गरेका थिए। अन्तर्राष्ट्रिय स्तरमा भने प्रतिक्रियाहरू मिश्रित छन्—कतिपयले घटनाले मध्यपूर्वमा तनाव थप चर्किने चेतावनी दिएका छन् भने केहीले इरानको शक्ति सन्तुलनमा ठूलो परिवर्तन आउने आँकलन गरेका छन्।
तीन दशकभन्दा बढी समयदेखि इरानको सर्वोच्च नेतृत्व सम्हाल्दै आएका खामेनेईको आकस्मिक निधनले अब उत्तराधिकारी, आन्तरिक शक्ति समीकरण र क्षेत्रीय सुरक्षा अवस्थालाई लिएर नयाँ बहस सुरु भएको छ ।
