प्रहार समाचार । काठमाडौँ, १६ फागुन २०८१ शनिबार । प्रतिनिधि सभा सदस्य निर्वाचन–२०८२ अन्तर्गत फागुन २१ गते हुने मतदानको दिन अत्यावश्यक बाहेकका सवारीसाधनमा कडाइ गरिने भए पनि जीवनरक्षक र सेवा प्रवाहसँग जोडिएका सवारी भने पासबिनै सञ्चालन गर्न पाउने भएका छन्।
निर्वाचन आयोग, नेपालले सवारीसाधनको अनुमति सम्बन्धी कार्यविधि, २०८२ अनुसार दमकल, एम्बुलेन्स, शववाहन, खानेपानीका ट्याङ्कर, दुध, फलफूल, तरकारी, माछा, मासु तथा पेट्रोलियम पदार्थ बोकेका सवारीलाई छुट दिने सिफारिस गरेको हो। यस्तै दूरसञ्चार, विद्युत, खानेपानी र ढल मर्मतका सवारी तथा अस्पतालका चिकित्सक र स्वास्थ्यकर्मी आवतजावतका सवारीसमेत निर्बाध चल्न पाउनेछन्।
आयोगका अनुसार अन्तर्राष्ट्रिय तथा आन्तरिक हवाई सेवाका यात्रु बोकेका सवारी—विमानस्थलदेखि घर वा होटलसम्म—पनि पास आवश्यक नपर्ने सूचीमा परेका छन्। हिँडडुल गर्न नसक्ने गर्भवती, सुत्केरी, अशक्त वा अपाङ्गता भएका व्यक्ति, ज्येष्ठ नागरिक मतदाता र उनका एक सहयोगी बोकेका सवारीलाई पनि छुट दिइएको छ। कूटनीतिक नियोगका ‘सीडी’ नम्बर प्लेट भएका सवारी, आयोगबाट परिचयपत्र प्राप्त पर्यवेक्षक, राष्ट्रिय मानव अधिकार आयोगका अनुगमन सवारी र प्रेस पास भएका सञ्चारकर्मीका सवारीसमेत सञ्चालन गर्न पाइनेछ।
सवारी पास व्यवस्थापनलाई छरितो बनाउन निर्वाचन आयोग परिसरमै निर्वाचन आयोग, गृह मन्त्रालय र जिल्ला प्रशासन कार्यालय काठमाडौँका प्रतिनिधि रहेको एकीकृत सवारीसाधन आवागमन डेस्क स्थापना गरिएको छ। काठमाडौँ, भक्तपुर र ललितपुरबाट जारी हुने पाससमेत सोही डेस्कबाट वितरण भइरहेको आयोगले जनाएको छ। आयोगले मतदानलाई व्यवस्थित र अत्यावश्यक सेवामैत्री बनाउने लक्ष्यसहित यो व्यवस्था लागू गरिएको स्पष्ट पारेको
