प्रहार समाचार | काठमाडौं, ३१ वैशाख २०८२, बुधबार — नेपाली राष्ट्रिय क्रिकेट टोलीका पूर्व कप्तान तथा सबैभन्दा छिटो १०० विकेट लिने कीर्तिमानी खेलाडी सन्दीप लामिछानेले यस पटकका लागि क्रिकेट संघ (CAN) को केन्द्रीय करार ननवाउने निर्णय गरेका छन्। उनले बुधबार सामाजिक सञ्जाल फेसबुकमार्फत् एक भावुक पोस्ट गर्दै उक्त निर्णय सार्वजनिक गरेका हुन्।
“यो क्रिकेट वा मेरो राष्ट्रबाट टाढा जाने निर्णय होइन—यो व्यक्तिगत र पेशागत रूपमा अझ परिपक्व हुनेतर्फको एक कदम हो,” लामिछानेले लेखेका छन्। उनले स्पष्ट पारेका छन् कि यो कुनै अलगाव होइन, बरु उद्देश्य र आत्मविकासबाट प्रेरित निर्णय हो।
लामिछानेले केन्द्रीय करार ननवाए पनि नेपालका लागि खेलिरहने प्रतिवद्धता प्रस्ट पारेका छन्। “म सधैंजस्तै जोश र समर्पणका साथ नेपालका लागि खेलिरहनेछु। त्यो गर्व र जिम्मेवारी सधैं मेरो मुटुसँग रहनेछ,” उनले उल्लेख गरेका छन्।
सन्दीप लामिछानेले CAN को निरन्तर साथ र आफ्नै क्रिकेट यात्रामा संघको योगदानप्रति आभार प्रकट गरेका छन्। उनले जीवनलाई निरन्तर परिवर्तनशील यात्रा बताउँदै नयाँ दिशा र सम्भावनाहरूको खोजीमा रहेको संकेत दिएका छन्।
“जीवन परिवर्तनशील यात्राहरूले भरिएको छ। अझ धेरै कुरा सिक्न बाँकी छ, दिन बाँकी छ, बन्न बाँकी छ। क्रिकेटसँगै र त्यसभन्दा पर पनि अबको यात्रा प्रति म उत्साहित छु,” लामिछानेको भनाइ छ।
उनको यो निर्णय नेपाली क्रिकेटमा नयाँ बहसको विषय बनेको छ। हालसम्म क्रिकेट संघले यसबारे औपचारिक प्रतिक्रिया दिएको छैन।
नेपालका लागि लामिछानेको भूमिका अझै महत्त्वपूर्ण रहनेछ, र प्रशंसकहरू उनका आगामी कदमहरू—चाहे त्यो घरेलु होस् वा अन्तर्राष्ट्रिय—नजिकबाट पछ्याइरहनेछन्।
