प्रहार समाचार १ असोज २०८१ मंङ्गलवार । तनहुँको देवघाट गाउँपालिका–३ मा रहेको छिपछिपे स्वास्थ्य चौकी कार्यम्पादनको आधारमा तनहुँ जिल्ला स्वास्थ्य संस्थाहरु मध्ये प्रथम हुन सफल भएको छ ।
गत आर्थिक वर्ष २०८० / ०८१ मा सम्पन्न कामहरुको मुल्यांकनमा प्रदेश स्वास्थ्य निर्देशनालयले तय गरेको स्वास्थ्य सेवा प्रदान गरेको सूचकको आधारमा उक्त मूल्याङ्कन गरिएको थियो । जस अन्तरगत तनहुँको देवघाट गाउँ पालिकामा पर्ने छिपछिपे स्वास्थ्य चौकी प्रथम हुन सफल भएको हो । त्यसैगरी शुक्लागण्डकी नगरपालिका -४ मा रहेको खैरेनीटार स्वास्थ्य चौकी द्वितीय र रिसिङ गाउँपालिका – २ मा रहेको काउँशिवपुर स्वास्थ्य चौकी तृतीय हुन सफल भएका छन् ।
खोप ,सुरक्षित मातृत्व , परिवार योजना लगायतका निर्धारित सूचकको मूल्याङ्कनबाट पुरस्कृत गरिएको स्वास्थ्य कार्यालय तनहुँले जनाएको छ। तनहुँ जिल्लामा ८५ वटा स्वास्थ्य चौकीहरु रहेका छन् ।
प्रथम, द्वित्तिय र तृतिय हुन सफल स्वास्थ्य चौकीका प्रमुख एवं प्रतिनिधिहरुलाई हिंजो सोमबार दमौलीमा आयोजित वार्षिक समिक्षा कार्यक्रममा जिल्ला समन्वय समिति तनहुँका प्रमुख शान्तिरमण वाग्ले , ब्यास नगरपालिकाका नगरप्रमुख बैकुण्ठ , स्वास्थ्य कार्यालय तनहुँका प्रमुख शेकरबाबु अधिकारी लगायतले संयुक्त रूपमा पुरस्कृत गरेका थिए।
.
