प्रहार समाचार । काठमाडौं, १५ असोज २०८३ बिहीबार । नेपाली कांग्रेसका निवर्तमान सभापति शेरबहादुर देउवाले पार्टी सभापति गगन थापा नेतृत्वको १५औँ महाधिवेशन प्रक्रियाभन्दा अलग आफ्नो समूहको समानान्तर महाधिवेशन अघि बढाउँदै वडा अधिवेशनमा सहभागी हुन नेता–कार्यकर्तालाई अपिल गरेका छन्। तस्बिर : एआई
देउवा पक्षले असोज १५ गतेदेखि वडा अधिवेशन सुरु गर्ने छुट्टै कार्यतालिका सार्वजनिक गरेसँगै देउवाले आफूलाई अझै ‘सभापति’कै हैसियतमा प्रस्तुत गर्दै ६ हजार ७ सय ४३ वडामा अधिवेशन सुरु हुने बताएका छन्। देउवाको अपिलमा पार्टीभित्रको मतभेदलाई १५औँ महाधिवेशनमार्फत समाधान गर्दै कांग्रेसलाई थप मजबुत बनाउने प्रण गरिएको छ। तर, यही अपिलले कांग्रेसभित्र देखिएको नेतृत्व र महाधिवेशनको वैधतासम्बन्धी गहिरो विवादलाई झन् सतहमा ल्याएको छ। सभापति गगन थापा नेतृत्वको कांग्रेसले आफ्नो महाधिवेशन प्रक्रिया अघि बढाइरहेका बेला देउवा पक्षले छुट्टै कार्यतालिकासहित समानान्तर अधिवेशन थालेको हो। थापा नेतृत्वको विशेष महाधिवेशनबाट आएको वर्तमान केन्द्रीय कार्यसमितिलाई देउवा पक्षले स्वीकार नगरेको विषयसमेत विवादको केन्द्रमा छ।
नेपाली कांग्रेस ‘पार्टीभित्रको मतभेदलाई १५औँ महाधिवेशनमार्फत समाधान गरेर पार्टीलाई थप मजबुत बनाउने प्रण गर्दछु’ भन्ने देउवाको अभिव्यक्ति अहिले कांग्रेसभित्रको राजनीतिक टकरावको महत्वपूर्ण सन्देश बनेको छ। एकातर्फ गगन थापा नेतृत्वको संस्थापन पक्षले निर्धारित प्रक्रियाअनुसार १५औँ महाधिवेशन अघि बढाइरहेको छ भने अर्कोतर्फ देउवा समूहले आफ्नै तालिकामा अधिवेशन थालेको छ। यसरी एउटै पार्टीको १५औँ महाधिवेशनलाई लिएर दुई धारबाट समानान्तर प्रक्रिया अघि बढेपछि देउवाको अपिलले कांग्रेसभित्रको संघर्ष केवल नेतृत्व हस्तान्तरणको विवाद नभई पार्टीको वैधानिकता, संगठनात्मक नियन्त्रण र आगामी नेतृत्वको दिशासँग जोडिएको संघर्षका रूपमा समेत देखाएको छ।
