प्रहार समाचार । पोखरा, १४ असोज २०८३ बुधबार । नेपाली कांग्रेसको १५औँ महाधिवेशनअन्तर्गत कास्की क्षेत्र नम्बर २ को क्षेत्रीय सभापतिमा नवीन बराल निर्वाचित भएका छन्। मंगलबार सम्पन्न निर्वाचनको अन्तिम मतपरिणाममा बरालले १ सय ४९ मतसहित नेतृत्व हात पार्दा निकटतम प्रतिस्पर्धी सुभाष सिग्देल १ सय ४२ मतमा रोकिए।
चार उम्मेदवारबीच भएको प्रतिस्पर्धामा बरालले झिनो मतान्तरबाट बाजी मारेका हुन्। क्षेत्रीय सभापतिका लागि भएको प्रतिस्पर्धामा देवराज आचार्यले १ सय ३१ मत र देवकृष्ण पराजुलीले ९४ मत प्राप्त गरे। कुल ५ सय ५४ प्रतिनिधि रहेको कास्की–२ मा ५ सय ४० मत खसेको थियो। परिणामले क्षेत्रीय नेतृत्वका लागि कांग्रेसभित्र देखिएको बहुकोणीय प्रतिस्पर्धालाई मतदानमार्फत टुंग्याएको छ। चार उम्मेदवार मैदानमा रहेकाले मत विभाजन भएको देखिन्छ भने बराल र सिग्देलबीचको अन्तर जम्मा ७ मत रहेको छ।
कास्की–२ को परिणामसँगै १५औँ महाधिवेशनमा क्षेत्रीय तहको नेतृत्व चयनको प्रतिस्पर्धा थप निर्णायक बनेको छ। यस क्षेत्रमा प्रदेशसभा ‘२ (क)’ तर्फ २ सय ५६ र ‘२ (ख)’ तर्फ २ सय ८४ मत खसेको थियो। निर्वाचन परिणाम सार्वजनिक भइरहेका बेला कास्की–२ कै मतदान प्रक्रियाबारे केही उम्मेदवारले मतपत्र र मतदातासम्बन्धी छानबिनको मागसमेत उठाएका छन्, जसले अब निर्वाचित नेतृत्वसामु संगठनात्मक एकता र निर्वाचनपछिको व्यवस्थापन मुख्य चुनौतीका रूपमा देखिएको छ।
