प्रहार समाचार । तनहुँ, १३ असोज २०७३ मङ्गलवार । नेपाली कांग्रेसको १५औँ महाधिवेशन नजिकिँदै जाँदा तनहुँ निर्वाचन क्षेत्र नं. १ बाट खस आर्य महिलातर्फ महाधिवेशन प्रतिनिधि पदमा नेपाली कांग्रेस तनहुँकी पूर्व जिल्ला सदस्य सान्नानी पाण्डेले उम्मेदवारी प्रस्तुत गरेकी छन् ।
नगरपालिका–१२ बाट क्षेत्रीय प्रतिनिधिमा निर्वाचित पाण्डेले आफ्नो उम्मेदवारीलाई व्यक्तिगत पदाकांक्षाभन्दा विचार, निष्ठा र पार्टी संगठनप्रतिको दीर्घकालीन प्रतिबद्धतासँग जोड्दै क्षेत्रीय प्रतिनिधिसामु मत मागेकी छन्। लामो समयदेखि पार्टी संगठन तथा सामाजिक क्षेत्रमा सक्रिय रहँदै आएकी पाण्डेले महाधिवेशन प्रतिनिधिका रूपमा पार्टी संगठनलाई थप सुदृढ बनाउने लक्ष्य अघि सारेकी छन्। उनले राष्ट्रियता, लोकतन्त्र र समाजवादलाई आफ्नो राजनीतिक आधारका रूपमा प्रस्तुत गर्दै कांग्रेसभित्र सक्रिय पुस्ताको भूमिका बढाउनुपर्ने र महिलाको सहभागितालाई केवल संख्यामा सीमित नराखी निर्णय तथा नेतृत्व तहमा अर्थपूर्ण बनाउनुपर्ने बताएकी छन्। पार्टी संगठनमा सक्रिय रहँदा महिला सहभागिता, नेतृत्व विकास र संगठन विस्तारका क्षेत्रमा काम गरेको अनुभवलाई महाधिवेशन प्रतिनिधिको जिम्मेवारीमा उपयोग गर्ने उनको भनाइ छ। स्थानीय तहदेखि नै पार्टीलाई जनतासँग थप जोड्दै संगठनलाई चलायमान, प्रभावकारी र जनउत्तरदायी बनाउन आफ्नो भूमिका केन्द्रित गर्ने उनले बताएकी छन्।
महाधिवेशन प्रतिनिधिको निर्वाचनमा क्षेत्र नं. १ का क्षेत्रीय प्रतिनिधिसँग मत माग्दै पाण्डेले आफूलाई अत्यधिक मतका साथ विजयी गराउन आग्रह गरेकी छन्। महिला अधिकार, सशक्तीकरण र नेतृत्व विकाससँगै पार्टी संगठन विस्तारलाई प्राथमिकतामा राख्ने प्रतिबद्धता जनाउँदै उनले कांग्रेसको नीति, विचार र संगठनलाई व्यवहारमै बलियो बनाउने उद्देश्यसहित उम्मेदवारी दिएको बताएकी छन्। क्षेत्रीय प्रतिनिधिहरूको मतबाट आफूलाई महाधिवेशन प्रतिनिधिको जिम्मेवारी प्राप्त भए त्यसलाई व्यक्तिगत उपलब्धिभन्दा पार्टी संगठन र महिला आवाजलाई सशक्त बनाउने जिम्मेवारीका रूपमा निर्वाह गर्ने उनको भनाइ छ।
