प्रहार समाचार । काठमाडौं, २५ बैशाख २०८३ शुक्रबार । नेपाल कम्युनिष्ट पार्टी (एकीकृत मार्क्सवादी–लेनिनवादी) ले राष्ट्रियसभा तर्फ आफ्नो संसदीय गतिविधिलाई थप प्रभावकारी बनाउने तयारीस्वरूप सांसद रोशनी मेचे लाई सचेतकको जिम्मेवारी दिएको छ ।
राष्ट्रियसभामा पार्टीको उपस्थिति, अनुशासन र विधेयक व्यवस्थापनलाई चुस्त बनाउने उद्देश्यसहित एमालेले मेचेलाई अगाडि सारेको हो ।पार्टीका राष्ट्रियसभा संसदीय दलका नेता रामबहादुर थापा ले मेचेलाई सचेतकमा नियुक्त गरेका हुन् । पछिल्लो समय राष्ट्रियसभामा राजनीतिक दलहरूबीच बढ्दो प्रतिस्पर्धा र विधेयकमाथिको बहस तीव्र भइरहेका बेला एमालेले अनुभवी र सक्रिय नेतृलाई जिम्मेवारी दिएको रूपमा यसलाई हेरिएको छ ।
सचेतकको भूमिकाले संसदभित्र दलका सांसदहरूलाई एकीकृत राख्ने, बैठकमा उपस्थित गराउने तथा पार्टीको आधिकारिक धारणा समन्वय गर्ने जिम्मेवारी बोकेको हुन्छ । यस्तो अवस्थामा मेचेको नियुक्तिलाई एमालेले महिला नेतृत्वलाई प्राथमिकता दिएको संकेतका रूपमा समेत अर्थ्याइएको छ ।एमालेभित्र संगठनात्मक जिम्मेवारीमा महिलाको सहभागिता बढाउने चर्चा चलिरहेका बेला मेचेलाई राष्ट्रियसभाको महत्त्वपूर्ण जिम्मेवारी दिइनुलाई पार्टीको आन्तरिक सन्तुलन र रणनीतिक निर्णयका रूपमा समेत हेरिएको छ ।
