🔥 सुनको मूल्य अहिले सम्मकै उच्च : चाँदीको मूल्यले पनि रेकर्ड तोड्यो

प्रहार समाचार । काठमाडौं, २० असोज २०८२ सोमवार । नेपाली बजारमा आज सुन र चाँदी दुवैको मूल्य अहिलेसम्मकै उच्च विन्दुमा पुगेको छ, जसले आम उपभोक्तादेखि व्यवसायीसम्मलाई चकित पारेको छ।

नेपाल सुनचाँदी व्यवसायी महासंघका अनुसार आज छापावाल सुनको मूल्य तोलामा दुई लाख ३३ हजार १ सय रुपैयाँमा पुगेको छ, जुन हालसम्मकै उच्च हो। अघिल्लो दिन आइतबार मात्रै सुनको मूल्य तोलामा ७ हजार ४ सय रुपैयाँले बढेर दुई लाख ३० हजार ६ सय रुपैयाँ पुगेको थियो। लगातार दुई दिनको यो तीव्र वृद्धिले सुन बजारमा नयाँ तरंग ल्याएको छ।

सुनसँगै चाँदीको मूल्यमा पनि आज नयाँ कीर्तिमान कायम भएको छ। महासंघले जनाएअनुसार, चाँदी प्रतितोला दुई हजार ९ सय ६० रुपैयाँमा कारोबार भइरहेको छ।

विशेषज्ञहरूका अनुसार अन्तर्राष्ट्रिय बजारमा सुन–चाँदीको मूल्य बढ्दै गएकाले नेपाली बजारमा पनि यसको प्रभाव देखिएको हो। हालको मूल्यवृद्धिले वैवाहिक तयारी गरिरहेकाहरू, सुन–चाँदीका थोक व्यापारी तथा लगानीकर्ताका लागि रणनीति पुनःसंरचना गर्नुपर्ने अवस्था सिर्जना भएको छ।

अबको दिनमा मूल्य अझै बढ्ने अनुमान गरिए पनि बजारको गतिशीलता र अन्तर्राष्ट्रिय राजनीतिक–आर्थिक परिदृश्यले यो दरलाई माथि–तल पार्न सक्ने देखिन्छ।