प्रहार समाचार । नवलपरासी, २ जेठ २०८२ शुक्रवार । पश्चिम नवलपरासीको सुनवल नगरपालिका–७ चारपालामा शुक्रबार अपरान्ह भीषण हावाहुरीसँगै परेको पानीले ठूलाे विपत्ति ल्याएको छ। प्रतीक्षालयमा ओत लागिरहेका स्थानीय पाँच जनालाई रूख ढलेर च्याप्दा दुई जनाको घटनास्थलमै मृत्यु भएको छ भने तीन जना गम्भीर घाइते भएका छन्।
इलाका प्रहरी कार्यालय सुनवलका प्रमुख सन्तोष पौडेलका अनुसार ३० वर्षीया मिरा बयम्बु र ४० वर्षीया दुर्गाबहादुर पुनको घटनास्थलमै निधन भएको हो। प्रतीक्षालयमाथि रूख ढल्दा संरचना नै भत्किएको प्रहरीले जनाएको छ।
घटनामा ४० वर्षीया नरमति परियार, ५१ वर्षीया दुर्गेश्वरा खाम्चा र २२ वर्षीय अनिल थापा गम्भीर घाइते भएका छन्। उनीहरूको उपचार अहिले रुपन्देहीको देवदह मेडिकल कलेजमा भइरहेको छ। स्थानीय तहले राहत र सहयोगको प्रक्रिया अघि बढाइरहेको जनाएको छ।
