प्रहार समाचार । काठमाडौँ, ९ वैशाख २०८३ बुधबार । देशभर गर्मीको प्रभाव बढ्दै जाँदा पहाडी र हिमाली भूभागमा भने मौसम आंशिक बदलीसहित अस्थिर बन्ने संकेत देखिएको छ। हाल पश्चिमी तथा स्थानीय वायुको आंशिक प्रभावका कारण कोशी प्रदेशका केही स्थानमा हल्का वर्षा भइरहेको छ भने अधिकांश भूभागमा मौसम सफा रहेको छ। तराई तथा उपत्यकामा तापक्रम क्रमशः बढ्दै गएकाले दैनिक जनजीवनमा गर्मीको असर महसुस हुन थालेको छ।
जल तथा मौसम विज्ञान विभागका अनुसार आज दिउँसो कोशी, बागमती र गण्डकी प्रदेशका हिमाली तथा पहाडी क्षेत्रमा आंशिकदेखि सामान्य बदली रहनेछ। यी क्षेत्रका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको छ। उता मधेशसहित लुम्बिनी र सुदूरपश्चिमका तराई क्षेत्रमा अत्यधिक गर्मी हुने र केही स्थानमा तातो लहरसमेत चल्न सक्ने पूर्वानुमान गरिएको छ।
रातिको समयमा भने अधिकांश भूभागमा मौसम सुधार हुने जनाइएको छ। कोशी प्रदेशका हिमाली क्षेत्रमा भने एक–दुई स्थानमा हल्का वर्षा र हिमपातको सम्भावना कायम रहनेछ। बदलिँदो मौसमीय अवस्थाले एकातिर पहाडमा आकस्मिक वर्षा र चट्याङको जोखिम बढाएको छ भने अर्कोतर्फ तराई क्षेत्रमा बढ्दो गर्मीले सतर्कता अपनाउनुपर्ने अवस्था सिर्जना गरेको छ।
