प्रहार समाचार । ललितपुर, मंसिर २७ बुधबार । ललितपुरको झम्सिखेलमा प्रहरीले गोली चलाएर लागुऔषध कारोबारीलाई नियन्त्रणमा लिन सफल भएको छ।
ललितपुर महानगरपालिका वडा नम्बर ३ ठाडो भर्याङनजिकै एक रेष्टुरेन्टमा लागुऔषध कारोबारी बसेको सूचनाका आधारमा सुरूमा सादा पोसाकका प्रहरी त्यहाँ पुगेका थिए।
सादा पोसाकका प्रहरीसँग लागुऔषध कारोबारी उदयपुर घर भएका अविनाश राईले ५५ लाख रुपैयाँमा एम्फेटामाइन आइस नामको लागुऔषध बिक्री गर्ने ‘डिल’ गरेका थिए। उनीसँग चार सय ९० ग्राम लागुऔषध थियो। उनले भारतबाट उक्त लागुऔषध ल्याएको प्रहरीको अनुमान छ। राईले प्रति ग्राम ९ हजारमा ल्याएको प्रहरीसँग बताएका थिए।
काठमाडौं उपत्यका अपराध अनुसन्धान कार्यालयका एसपी रवीन्द्र रेग्मीका अनुसार लागुऔषध कारोबारीलाई नियन्त्रणमा लिन गोली चलाइएको हो। उनको दाहिने खुट्टामा गोली लागेको छ भने राष्ट्रिय ट्रमा सेन्टरमा उपचार भइरहेको छ।
