प्रहार समाचार । तनहुँ, फागुन ७ सोमवार । जन्ति बोकेको बोलेरो जीप तनहुँको आँबुखैरेनी गाउँपालिका वडा नम्बर १ गिरौनचोरमा दुर्घटना हुँदा दुईजनाको मृत्यु भएको छ।
बरादी–हिलेखर्कस्थित भित्री सकखण्डमा गइरहेको बा१८च ५९२१ नम्बरको बोलेरो जीप आइतबार राति साढे १२ बजे दुर्घटनाग्रस्त बनेको हो। दुर्घटनामा तनहुँ, आँबुखैरेनी–६ छापस्वाँराका ७२ वर्षीय आशवीर गुरूङ र ब्यास नगरपालिका–९ गजौडेका १७ वर्षीया तुलसी गुरूङको मृत्यु भएको प्रहरीले जनाएको छ।
जिल्ला प्रहरी कार्यालय तनहुँका प्रवक्ता तथा डिएसपी मोहनबहादुर खाँडका अनुसार आशवीरको घटनास्थलमै र तुलशीको उपचारका क्रममा नयाँ मेडिकल कलेज भरतपुरमा आज बिहान मृत्यु भएको हो। अनियन्त्रित भई सडकबाट तल खसेको प्रारम्भिक अनुसन्धानमा देखिएको डिएसपी खाँडले बताए। दुर्घटनामा चालकसहित १६ जना घाइते भएका छन् । घाइतेमध्ये ६ जनाको आँबुखैरेनी अस्पताल तनहुँ र १० जनाको नयाँ मेडिकल कलेज भरतपुरमा उपचार भइरहेको छ।
